Goa News: धारबांदोडा येथील गोवा मल्टिफॅकल्टी महाविद्यालयाचा एनएसएस विभाग आणि धारबांदोडा तालुका वाहतूक संचालनालय यांच्या संयुक्त विद्यमाने ‘रस्ता सुरक्षा’विषयावर विद्यार्थ्यांसाठी मार्गदर्शनपर व्याख्यानाचे आयोजन करण्यात आले होते.

रस्ता सुरक्षा आणि सुरक्षित वाहन चालविणे याबाबतच्‍या या उपक्रमाद्वारे विद्यार्थ्यांना उपयुक्त अशी माहिती साहायक वाहतूक संचालक संतोष गावडे आणि वाहतूक निरीक्षक संकल्प नावती यांनी दिली. या मान्यवरांनी विद्यार्थ्यांना वाहतूक नियमांचे पालन करण्याचे आवाहन केले.

रस्ता (Road) सुरक्षा उपायांची माहिती यावेळी देण्यात आली. अपघात कसे टाळले जाऊ शकतात, वाहन चालविताना आणि वाहनावर असताना कसे सजग रहावे, याबाबत त्यांनी सूचना केल्या. संस्थेचे प्राचार्य शेख मोहम्‍मद परवेझ अल-उस्मानी यांनी आपल्या स्वागतपर भाषणात विद्यार्थ्यांनी वाहन चालविताना आणि वाहनावर बसल्यानंतर जबाबदारीने वागावे असे आवाहन केले.

वाहनचालकांनी जबाबदारीने वाहन चालविल्यास ते आपल्‍याबरोबरच दुसऱ्याचाही जीव वाचवू शकतात असे सांगून बेदरकारपणे वाहन चालवल्याने अनेक युवकांनी जीव गमावले आहेत याकडे त्यांनी लक्ष वेधले. प्रत्‍येकाने वाहतुकीचे नियम पाळावेत, त्‍यांचे उल्लंघन करू नये असे आवाहन यावेळी करण्‍यात आले. एनएसएस कार्यक्रम अधिकारी साहाय्‍यक प्राध्यापक राजेंद्र गवंडर यांनी आभार मानले.