पणजी: गोव्यात येऊन गुंडगिरी करणाऱ्या पर्यटकांना पोलिस महासंचालक अलोक कुमार यांनी सज्जड दम दिला आहे. कायदा हातात घेण्याचा प्रयत्न केल्यास कारवाईचा सामना करावा लागेल, असे कुमार यांनी म्हटले आहे. गेल्या आठवड्यात घडलेल्या मारहाणीच्या दोन घटनानंतर पोलिस महासंचालकांनी पर्यटकांना इशारा वजा सूचना केलीय.

"दिवसा पर्यटक पट्ट्यात स्थानिक पोलिस, पर्यटक पोलिस, वाहतूक पोलिस तौनात करण्यात आले आहेत. रात्रीच्या वेळेस समुद्रकिनारी भागात नाकाबंदी केली जात आहे. कोणत्याही प्रकारची घटना घडल्यास योग्य कारवाई केली जात आहे. आवश्यक असल्यास अटक देखील केली जात आहे. कोणी कायदा हातात घेण्याचा प्रयत्न करत असेल तर त्याच्या विरोधात झिरो टॉलरन्स पॉलिसी आम्ही अवलंबली आहे."

"गोवा शांतताप्रिय राज्य आहे. येथे येणाऱ्या पर्यटकांनी गोव्यातील पर्यटनाचा आस्वाद घ्यावा, काही अनुचित करण्याचा प्रयत्न करुन नये. एक - दोन ज्या घटना उघडकीस आल्या त्याविरोधात पोलिसांनी तात्काळ आवश्यक कारवाई केलीय. स्थानिक आणि पर्यटकांनी जबाबदारीने वागावे. काही गैर घडत असल्यास पोलिस आवश्यक ती कारवाई करतील", असे पोलिस महासंचालक अलोक कुमार म्हणाले.

गेल्या आठवड्यात गोव्यात दोन हाणामारीच्या घटना उघडकीस आल्या. दुचाकीला कारची धडक बसली म्हणून स्थानिक गोंमतकीय व्यक्तीला नाशिक येथून आलेल्या पर्यटकांनी जबर मारहाण केली. तर, एका रिसॉर्टमध्ये सुरक्षा रक्षकांना मारहाण झाल्याची घटना उघडकीस आली. या दोन्ही प्रकरणाची पोलिसांनी तात्काळ दखल घेत कारवाई केली. यानंतर पोलिसांनी पर्यटकांना जबाबदारीने वागण्याचे आवाहन केले आहे.