Goa Dairy गोवा डेअरीच्या प्रशासकीय समितीचे अध्यक्ष पराग नगर्सेकर यांच्या अध्यक्षतेखाली महासंघाची वार्षिक सर्वसाधारण सभा पार पडली. यावेळी सभेत टीडीएस भरणा उशीराने झाल्याने डेअरीला संबंधित खात्याने दहा लाख रुपयांचा दंड ठोठावला आहे.

तो दंड संबंधित कर्मचाऱ्यांकडून वसूल करावा असा निर्णय घेण्यात आला. तर डेअरीच्या नुकसानीच्या संदर्भात आढावा घेण्यात आला. उसगावातील पशुखाद्य प्रकल्पामुळेच दूध महासंघाला तोटा होत असून सद्यस्थितीत महासंघाला 7 कोटी 68 लाखांचा तोटा सहन करावा लागला.

दूध प्रकल्पातील निधी पशुखाद्य प्रकल्पाला द्यावा लागत असल्यानेच हा तोटा होत असल्याचे स्पष्ट झालेय. त्यामुळे सद्यस्थितीत बंद असलेला पशुखाद्य प्रकल्प चालवण्यासाठी सरकारकडे देण्यात येणार असल्याचे सभेत ठरवण्यात आले.

तसेच डेअरीकडून दूध उत्पादकांना गुरांसाठी पुरेसा औषध साठा उपलब्ध करून दोन पशुवैद्यकांची नियुक्ती करावी अशी मागणी आमसभेत केली गेली.

त्यालाही सभेत मान्यता मिळाली असून उत्तर व दक्षिण गोव्यात दोन पशुवैद्यक उपलब्ध करून देण्यात येणार असल्याचे सांगण्यात आले. तसेच शेतकऱ्यांना दुधावरील आधारभूत किंमत वेळच्यावेळी देण्यासंबंधीही निर्णय घेण्यात आला.