Dabolim Airport वास्को- दाबोळी आंतरराष्ट्रीय विमानतळावर बाॅम्ब ठेवल्याचा फोन नियंत्रण कक्षात येताच विमानतळावरील सुरक्षा यंत्रणेची तारांबळ उडाली. निनावी आलेला हा फोन कोणी केला याची नंतर चौकशी करण्यात आली व या प्रकरणी पेडण्यातील एका मजुरास ताब्यात घेण्यात आले.

दाबोळी विमानतळावर बाँब ठेवल्याचा फोन आल्यानंतर पोलिस, बाँब निकामी पथक, श्वानपथक व अग्निशमन दलाने त्वरित विमानतळावर जाऊन शोध कार्य सुरू केले, परंतु कुठेच बाँब किंवा कोणतीही बाँबसदृश वस्तू आढळून आली नाही. त्यामुळे फोन करणाऱ्याचा शोध घेण्यात आला व उशिरा त्याला मोपा येथून ताब्यात घेण्यात आले.

‘तो’ निघाला मजूर!

गोवा पोलीस नियंत्रण कक्षाला बेनावी फोन केल्याप्रकरणी मोपा पोलीसांनी पेडणे येथील संशयित कुंदन कुमार या 22 वर्षीय युवकाला ताब्यात घेतले आहे. फोन करणाऱ्या व्यक्तीची पडताळणी सुरू केली असता त्याचे लोकेशन मोपा विमानतळ परिसर मिळाले.

त्यानुसार मोपा पोलिस ठाण्याचे निरीक्षक निनाद देउलकर यांनी तपास सुरू केला. तपासाअंती, संशयित मजूर असल्याचे समजल्यावर पोलिसांनी त्याला अटक केली.