गोव्यातील व लोह खनिज व्यवसायाशी संबंधित एस. ए. एक्स्पोर्ट कंपनीचा बोगस ईमेल तयार करून सुमारे चाळीस कोटी रुपयांची फसवणूक झाल्याची घटना समोर आली आहे. याप्रकरणी गोवा सायबर गुन्हे पोलिसांनी देवल शारदा (होस्पेट, कर्नाटक मूळ सिंगापूर) आणि अतूल दीपकभाई पटेल (होस्पेट, कर्नाटक) या दोघांविरुद्ध गुन्हा दाखल करण्यात आला आहे.

सायबर गुन्हे पोलिसांनी दिलेल्या माहितीनुसार संशयितांनी कटकारस्थान रचून एस. ए. एक्स्पोर्ट कंपनीचा बनावट ईमेल तयार केला. या कंपनीच्या सर्व व्यवहारासाठी व कायदेशीर निर्णय घेण्यासाठी संशयितांना अधिकर असल्याचा दावा करून २४ जून २०२४ रोजी तक्रारदाराच्यावतीने बोगस करार केला. त्यामध्ये लोह खनिज निर्यातदार कंपनीचा ४० कोटींचा आर्बिटेशन दावा ३.११ कोटींत निकाली काढत फसवणूक करण्यात आली होती व उर्वरित रक्कम तक्रारदाराला कोणतीही कल्पना न देता देवल या संशयिताने अतुलच्या बँक खात्यात हस्तांतरीत केले, असे पोलिसांत दिलेल्या तक्रारीत म्हटले आहे.

विदेशातील एका कंपनीसोबतच्या आर्बिटेशन प्रक्रियेत मदत करुन पैसे परत मिळवून देण्यासाठी या दोन्ही संशयितांनी तक्रारदाराला आश्वासन दिले होते. मात्र या दोघाही संशयितांनी तक्रारदाराला कोट्यवधींना गडा घातल्याने भारतीय नागरिक संहितेच्या कलम १११(२), ३१८ (४), ३३६ (२), ३(५) व माहिती तंत्रज्ञान कायद्याच्या कलम ६६सी व ६६ डी खाली गुन्हा नोंदवण्यात आला आहे.