पणजी: राज्यात नाताळ सणानिमित्त सर्व तयारी झाली असून सर्वत्र अतिशय उत्साहाचे वातावरण आहे. राजधानी पणजीतील अनेक भागात नक्षत्र आणि उत्कृष्ट विद्युत रोषणाई करण्यात आली असून पणजीतील चर्च स्क्वेअर परिसरात ख्रिसमस ट्री, सांता, हरणे आदींची आकर्षक देखावे उभारले असून रात्रीच्या वेळी अनेक पर्यटक तसेच स्थानिक येथे येत सेल्फि व फोटो काढत आहेत.

नाताळ सणानिमित्त चर्चस्क्वेअर परिसर आकर्षणाचे केंद्र ठरला आहे. पणजी बाजारात नाताळनिमित्त मोठ्या प्रमाणात मिठाई खरेदी केली जात असून बेबिंका व इतर पारंपरिक गोड पदार्थांना मागणी अधिक आहे. त्यासोबतच केक आणि इतर खाद्यपदार्थांची खरेदीदेखील वाढली आहे.

नाताळनिमित्त विद्युत रोषणाई, गोठा सजावट, नक्षत्र बनविणे आदी कामे संपुष्टात आली असून अतिशय उत्साहाने सर्वत्र सण साजरा केला जात आहे. अनेक ठिकाणी सांस्कृतिक कार्यक्रम, अनेक संघटनांकडून राज्यस्तरीय गोठा बनविणे, नक्षत्र बनविणे आदी स्पर्धांचे देखील आयोजन करण्यात आले आहे.

नववर्षाच्या स्वागतासाठी सज्ज

नववर्षाच्या स्वागतासाठी आता पर्यटक गोव्यात दाखल होत असून किनाऱ्यांवर सायंकाळच्या वेळी मोठ्या प्रमाणात गर्दी वाढत असल्याचे दिसत आहे. किनाऱ्यांवर सुरक्षेसंबंधी देखील योग्य ती काळजी घेतली जात असून आवश्‍यक प्रमाणात जीवरक्षकही तैनात करण्यात आले आहेत.