Goa Crime News: वेर्णा येथील बिर्ला जंक्शनजवळ क्राईम ब्रँचने मूळ बिहारचा व सध्या कुठ्ठाळी येथे राहत असलेल्या संशयित जीतेंद्र सुदर्शन महातो (33वर्षे) याला ड्रग्जप्रकरणी अटक केली. त्याच्याकडून 310 ग्रॅम गांजा जप्त केला असून त्याची किंमत सुमारे 35 हजार रुपये असल्याची माहिती पोलिसांनी दिली.

क्राईम ब्रँच पोलिसांनी दिलेल्या माहितीनुसार कुठ्ठाळी या परिसरात ड्रग्जची विक्री होत असल्याची माहिती मिळाली होती. त्यामुळे काल संध्याकाळच्या सुमारास या परिसरामध्ये पोलिस गस्त ठेवण्यात आली होती. बिर्ला जंक्शनजवळ मिळालेल्या वर्णनाशी मिळताजुळता एक तरुण उभा होता.

दरम्यान, त्याच्या हालचालीही संशयास्पद होत्या त्यामुळे त्याला ताब्यात घेऊन केलेल्या झडतीत त्याच्याजवळ गांजा सापडला. त्याने तो विक्रीसाठी आणला असल्याचे कबूल केले. त्याच्याविरुद्ध अंमलीपदार्थविषयक कायद्याखाली गुन्हा दाखल केला आहे. अधिक चौकशीसाठी त्याला पोलिस कोठडी घेण्यात आली आहे.

राज्यात गेल्या महिन्याभरापासून पोलिसांनी ड्रग्जविरोधात तीव्र कारवाई सुरू केली आहे. या कारवाईत अधिक तर गांजाची विक्री होत असल्याचे दिसून आले आहे. गांजा विक्री करणारे हे बहुतेक परप्रांतीय आहेत.