child molestation case Goa: पर्वरी येथील सुकूर परिसरातील '२० पॉइंट' भागात एका ६ वर्षांच्या चिमुकलीचा विनयभंग केल्याची धक्कादायक घटना समोर आली आहे. या प्रकरणी पर्वरी पोलिसांनी ४७ वर्षीय स्कूल व्हॅन चालक अल्लाबक्ष सय्यदबडे याला अटक केली आहे. संशयित आरोपी हा एका खाजगी 'इको' स्कूल व्हॅनवर चालक म्हणून काम करत होता आणि संबंधित बालिकेला घरातून शाळेत नेण्या-आणण्याचे काम करायचा.

व्हॅन चालकाचा विश्वासघात

मिळालेल्या माहितीनुसार, संशयित आरोपी अल्लाबक्ष हा मागील काही काळापासून या चिमुकलीला शाळेत सोडण्यासाठी आणि परत आणण्यासाठी व्हॅन चालवत होता. मात्र, ज्या विश्वासाने पालकांनी आपल्या मुलीला त्याच्याकडे सोपवले होते, त्याच विश्वासाला तडा देत त्याने चिमुकलीचा विनयभंग केला. पीडित मुलीने दिलेल्या माहितीनंतर पालकांनी तातडीने पोलिसांत धाव घेतली.

गंभीर कलमान्वये गुन्हा दाखल

पर्वरी पोलिसांनी या प्रकरणी गुन्हा क्रमांक १०१/२०२५ नोंदवला असून, भारतीय न्याय संहिता (BNS) आणि 'पोक्सो' (POCSO) कायद्यातील अत्यंत कठोर कलमे लावली आहेत; BNS कलमे: ६४, ७४, ३५१ आणि ११५(२), POCSO कलमे: ८(१) आणि ८(२) (मुलांवरील लैंगिक अत्याचार आणि विनयभंग) याअंतर्गत पोलिसांनी तपास सुरु केला आहे. पर्वरी पोलीस निरीक्षक प्रतोती देसाई यांच्या मार्गदर्शनाखाली या प्रकरणाचा सखोल तपास सुरू आहे.