वास्को: झुआरीनगर-सांकवाळ येथील फ्लॅट फोडून अज्ञात चोरट्यांनी साडेआठ लाखांचा ऐवज लंपास केल्याची तक्रार गांधीनगरमांगोरहिल येथील राज दुलारी राणा यांनी १९ ऑक्टोबरला वेर्णा पोलिस स्थानकात केली आहे. याप्रकरणी वेर्णा पोलिसांनी अज्ञाताविरोधात गुन्हा दाखल केला आहे.

पोलिसांनी दिलेल्या माहितीनुसार, हा फ्लॅट बंद होता. या संधीचा फायदा घेत अज्ञात चोरट्यांनी ९ सष्टेंबरच्या दुपारी साडेतीन ते १८ ऑक्टोबरच्या सायंकाळी ५ वा. या दरम्यानच्या काळात फ्लॅट फोडला.

फ्लॅटच्या मुख्य दरवाजातून अज्ञात चोरट्यांनी प्रवेश करून ४०.१८० ग्रॅमच्या दोन बांगड्या, ३० ग्रॅमचे एक मंगळसूत्र, ७.५ ग्रॅम दोन अंगठ्या, ७.५ ग्रॅमची कर्णफुले असे सोन्याचे दागिने व दोन मनगटी घड्याळे चोरून नेली. या सर्व ऐवजाची किंमत साडेआठ लाख रुपये होते.

दरम्यान, राज दुलारी राणा या १९ ऑक्टोबरला फ्लॅटकडे आल्या असता, त्यांना फ्लॅट फोडल्याचे दिसून आले. याप्रकरणी पोलिस निरीक्षक आनंद शिरोडकर यांच्या मार्गदर्शनाखाली उपनिरीक्षक महेश भोमकर पुढील तपास करीत आहेत.