वास्को : गोव्यातील वाडे परिसरातील एका श्रीमंत वस्ती असलेल्या कॉलनीत शुक्रवारी मध्यरात्री रायबंदर सायबर क्राईम पोलिसांनी मोठी कारवाई करत क्रिकेट सट्टा प्रकरणी तिघांना ताब्यात घेतले. या कारवाईत पोलिसांनी लाखो रुपयांचा मुद्देमाल जप्त केला आहे.

ही कारवाई पोलिस अधीक्षक राहुल गुप्ता यांच्या मार्गदर्शनाखाली, पोलिस निरीक्षक दीपक पेडणेकर यांच्या नेतृत्वाखालील पथकाने केली. या पथकात उपनिरीक्षक नवीन नाईक, मंदार देसाई आणि इतर पोलिसांचा समावेश होता.

छाप्यात पोलिसांनी ताब्यात घेतलेल्या आरोपींची ओळख पटली असून त्यामध्ये बिहारमधील तिघांचा समावेश आहे. यात रवींद्र कुमार शर्मा हा सुपल जिल्ह्यातील बासखोरा गावचा रहिवासी आहे, तर सुनील कुमार हा सुपल जिल्ह्यातील सरोजाबेला येथील आहे. तिसरा आरोपी बिरेंद्र कुमार मोंडाल हा मधुबनी जिल्ह्यातील बासीपट्टी गावचा रहिवासी असल्याचे समोर आले आहे.

पोलिसांनी आरोपींकडून मोठ्या प्रमाणावर सट्टा व्यवहारासाठी वापरलेले साहित्य जप्त केले आहे. यात ११ मोबाईल फोन, सीम कार्ड्स, १ लॅपटॉप, २ ऑडिओ मिक्सर, बेकायदेशीर टेलिकम्युनिकेशन युनिट्स आणि अन्य उपकरणांचा समावेश आहे.

या सर्व साहित्याची तपासणी सुरू असून, आरोपींनी कोणत्या माध्यमातून सट्टा व्यवहार केला आणि त्यामागील मोठे रॅकेट आहे का, याचा शोध पोलिस घेत आहेत.