Goa Crime News: नेरूळ येथे एका बनावट कॉल सेंटरचा पर्वरी पोलिसांनी सोमवारी रात्री अचानक छापा टाकून पर्दाफाश केला. हे बनावट कॉल सेंटर चालवणाऱ्या पार्थ पटेल(३१ ,रा.मूळ गुजरात, अर्जुन(२६, रा.गुजरात  ) आणि सुबोध शर्मा (४३, रा.मुंबई ) या तिघा बिगर गोमंतकीयांना पर्वरी पोलिसांनी अटक केली.

आजकालच्या जीवनात आर्थिक फसवणुकीच्या अनेक घटना घडत आहेत. आकर्षक ऑफर्स, स्कीम, बक्षिसे देऊन भोळ्या लोकांना फसवणारे आणि ऑनलाईन आर्थिक व्यवहार करून लोकांची फसवणूक करणाऱ्या बनावट कॉल सेंटर्सचा ट्रेंड वाढला आहे.

मंगळवारी उत्तर गोव्याचे पोलिस अधीक्षक अक्षद कौशल यांनी पत्रकार परिषद घेऊन या अचानक छाप्याची माहिती प्रसारमाध्यमांना दिली. स्थानिक गुप्तचरांनी दिलेल्या माहितीवरून पर्वरी पोलिसांनी नेरूळमधील बनावट कॉल सेंटरवर अचानक छापा टाकल्याचे कौशल यांनी उघड केले.संशयित हे अमेरिकेतील (America) लोकांशी व अन्य विदेशींशी संपर्क साधायचे. ते स्वतःला मायक्रोसॉफ्टचे कर्मचारी असल्याची बतावणी करून ते तांत्रिक समर्थन (टेक्निकल सपोर्ट) व अँटीव्हायरस देण्याच्या बहाण्याने कॉलर्सशी संपर्क करायचे.

यासाठी ते लॅपटॉप व मोबाईल व इतर उपकरणांचा वापर करायचे. यातून ते पीडित कॉलर्सकडून पैसे उकळायचे. याप्रकरणी पुढील तपास पोलिस उपनिरीक्षक मंदार परब हे करत आहेत. पर्वरी पोलिसांनी (Police) तिघांवर भादंवि कलम ४१९, ४२० व ३३ अन्वये गुन्हा दाखल केला आहे, अशी माहिती कौशल यांनी दिली.