कोजुर्वे, हळदोणा येथे इयत्ता सातवीत शिकणाऱ्या विद्यार्थ्याला शिक्षकाने मारहाण केल्याची घटना समोर आली आहे. पीटीच्या शिक्षकाने ही मारहाण केली. मुलाच्या अंगावर अनेक ठिकाणी व्रण दिसत आहेत. मुलाच्या पालकांना घटनेबद्दल कळताच त्यांनी तात्काळ शिक्षकाविरुद्ध पोलिस ठाण्यात धाव घेतली.

पालकांनी मारहाण करणाऱ्या शिक्षकाविरुद्ध (Teacher) रिसतर तक्रार नोंदवली. म्हापसा पोलिसांनीही तक्रारीची दखल घेत घटनास्थळी पोहोचून शिक्षकाला ताब्यात घेतले. पोलिस या प्रकरणाचा पुढील तपास करतायेत.

दरम्यान, राज्यात मागील काही दिवसांपासून सातत्याने अशा प्रकारच्या घटना समोर येतायेत. काही दिवसांपूर्वी, कामुर्ली येथील एका प्राथमिक शाळेत इयत्ता चौथीत शिकणाऱ्या नऊ वर्षीय विद्यार्थ्याला अमानुष मारहाण केल्याप्रकरणी कोलवाळ पोलिसांनी दोन शिक्षिकांविरुद्ध गुन्ह्याची नोंद करत ताब्यात घेतले होते.

विद्यार्थ्याने (Student) वहीची दोन पाने फाडल्याचा राग आल्याने संतप्त शिक्षिकेने या पीडिताला बेदम मारहाण केली. पोलिसांनी संशयिताविरुद्ध भारतीय न्याय संहितेच्या कलम 118(1), 126(2), 351(2) व 3(5) तसेच गोवा बाल कायद्यान्वये गुन्हा नोंदविला.

कोलवाळ पोलिसांच्या माहितीनुसार, कामुर्ली येथील एका खासगी प्राथमिक शाळेत इयत्ता चौथीत शिकणाऱ्या विद्यार्थ्याला शिक्षिकेने जबर मारहाण केली. तिने स्टीलच्या पट्टीने मुलाच्या हाता-पायावर तसेच पाठीवर मारहाण केली.