Goa Crime: मेरशी सर्कलजवळ अज्ञाताने गळफास घेऊन संपवले जीवन, कुजलेल्या अवस्थेत सापडला मृतदेह; पोलिस तपास सुरु

पणजी: मेरशी सर्कलजवळ सर्व्हिस रस्त्याच्या बाजूला असलेल्या झाडाझुडपात गळफास घेऊन आत्महत्या केलेला अज्ञात व्यक्तीचा मृतदेह सापडला आहे. मृतदेह कुजलेल्या स्थितीत असल्याने त्याची ओळख पटवण्यापलीकडे आहे.

शवचिकित्सेसाठी तो गोमेकॉ इस्पितळातील फोरेन्सिक मेडिसीन विभागात पाठवला आहे. प्रथमदर्शनी नैसर्गिक मृत्यू म्हणून नोंद करण्यात आली आहे. या घटनेची माहिती बुधवारी (11 डिसेंबर) दुपारी १.३० वा.च्या सुमारास मिळाल्याची माहिती जुने गोवे पोलिसांनी दिली.

मेरशी येथील रस्त्याच्या बाजूला असलेल्या झाडाझुडपांत मृतदेह लोंबकळत असल्याची माहिती पोलिस नियंत्रण कक्षाला आली होती. त्यानुसार जुने गोवे पोलिसांनी घटनास्थळी जाऊन या मृतदेहाची पाहणी केल्यास तो कुजलेल्या अवस्थेत होता व दुर्गंधी येत होती. मृतदेहाच्या शरीरावर लांब बाह्याचा शर्ट तसेच लांब पँट होती. कपड्याच्या दोरीने गळफास घेण्यात आला होता.