म्हापसा: गोव्यातून भाड्याने घेतलेल्या आलिशान गाड्यांची नंबर प्लेट बदलून त्या परराज्यात घेऊन जाणाऱ्या एका टोळीचा पर्दाफाश करण्यात गोवा पोलिसांना यश आलं आहे. कोलवाळ पोलिसांनी याप्रकरणी गुजरात आणि राजस्थानमधील दोन व्यक्तींना रंगेहाथ पकडले आहे, मात्र त्यांचे काही साथीदार पळून जाण्यात यशस्वी झाले आहेत.

आलिशान गाड्यांची नंबर प्लेट बदलण्याचा डाव उधळला

ही घटना म्हापसा येथील करासवाडा येथील एका जंगली भागात घडली. कोलवाळ पोलीस निरीक्षक संजित कंदोळकर यांना मिळालेल्या गुप्त माहितीनुसार, दोन टोयोटा फॉर्च्युनर गाड्यांची नंबर प्लेट बदलली जात असल्याची खबर मिळाली होती.

या गाड्या कळंगुट आणि कांदोळीमधून भाड्याने घेतल्या होत्या. आरोपींनी गोव्याची (GA) नंबर प्लेट काढून त्याऐवजी राजस्थान (RJ) आणि पंजाबची (PB) नंबर प्लेट लावण्याचा प्रयत्न करत असतानाच पोलिसांनी त्यांना रंगेहाथ पकडले.

पोलिसांनी घटनास्थळी धाव घेत दोघांना ताब्यात घेतले. मात्र, याचवेळी त्यांचे काही साथीदार पळून जाण्यात यशस्वी झाले. पोलीस आता फरार आरोपींचा शोध घेत आहेत. प्राथमिक माहितीनुसार, ही टोळी आंतरराज्यीय वाहन चोरीच्या मोठ्या रॅकेटशी संबंधित असण्याची शक्यता आहे. या घटनेमुळे पर्यटनाच्या नावाखाली गोव्यात सुरू असलेल्या गुन्हेगारी कारवाया पुन्हा एकदा समोर आल्या आहेत.