Goa Crime: कुडतरी पोलिस स्थानकाच्या हद्दीत काल सकाळपासून राहत्या घरातून बेपत्ता झालेल्या तीन अल्पवयीन मुलींचा माग काढत पोलिसांनी या गुन्ह्यात सहभागी असलेल्या पाचजणांना अटक केली. ही कामगिरी पोलिसांनी मोठ्या शिताफिने पार पाडली.

या तीन तीन अल्पवयीन मुली हरवल्यानंतर त्यांच्या पालकांनी पोलिस तक्रार दाखल केली होती. त्‍यानुसार पोलिसांनी तातडीने लक्ष घालून तपास सुरू केला असता त्‍या नुवे येथे असल्याचे पोलिसांना आढळून आले. नंतर लगेच त्या ठिकाणी पोलिसांनी धाव घेतली व या मुलींना आपल्या ताब्यात घेतले.

यावेळी मुलींसोबत 5 युवकही पोलिसांना आढळून आले. त्‍यांनाही पोलिसांनी ताब्यात घेतले आहे. देमेट्रियस फर्नांडिस (१८), कायमिक्स कुतिन्हो (१९), मर्विन कुतिन्हो (१८), डायगो फर्नांडिस (१९, सर्वजण रा. नुवे) व अझीम अहमद (२१, रा. फातोर्डा) अशी संशयितांची नावे आहेत.

मोबाईल केले होते स्‍वीच ऑफ, तरीही पोलिसांनी काढला माग-
या मुलींना संशयितांनी नुवे येथील डोंगरावर निर्जनस्‍थळी नेले होते. सर्वांनी आपला मोबाईल स्वीच ऑफ केला होता. त्‍यामुळे मुलींचा शोध घेण्यासाठी पोलिसांनी अत्‍याधुनिक तंत्रज्ञानाचा वापर केला व मागोवा घेत हे ठिकाण गाठले.

या मुलींशी अनैतिक प्रकार तर घडला नाही ना, याची शहानिशा करण्यासाठी पोलीसांनी त्‍यांना वैद्यकीय तपासासाठी पाठविले आहे. त्‍याचा अहवाल येणे बाकी आहे.