Goa Crime: म्हापशातील सराफ दुकानातून 25 ग्रॅम वजनाचे सोन्याचे कडे चोरणाऱ्यास म्हापसा पोलिसांनी अटक केली आहे. त्याच्याकडून सोन्याचे कडे जप्त करण्यात आले आहे. सध्या त्याच्या पत्नीला पोलिसांत हजर राहण्याची नोटीस पाठवण्यात आली आहे. हे दोघे ग्राहक म्हणून या दुकानात आले होते.

19 डिसेंबर रोजी सायंकाळी सहाच्या सुमारास एक अनोळखी दाम्पत्य ग्राहक म्हणून म्हापशाच्या म्युनिसपल मार्केटमधील नागवेकर ज्वेलर्समध्ये आले. त्यांनी इतरत्र लक्ष वेधून घेत डिस्प्ले काऊंटरमधील सोन्याचे 25 ग्रॅम वजनाचे कडे चोरले होते.

दुकान मलाक गौरेश नागवेकर यांनी याबाबत म्हापसा पोलिसांत तक्रार दाखल केली होती. त्यावरून पोलिसांनी गुन्हा दाखल केला होता.

पोलिस निरीक्षक शितकांत नायक आणि पोलिस उपनिरिक्षक विराज कोरगावकर, हेड कॉन्स्टेबल सुशांत चोपडेकर, अल्विटो डिमेलो, राजेश कांदोळकर, हर्षदा चोडणकर यांचे पथक तयार केले.

सूत्रांकडून माहिती मिळाल्यानंतर ओल्ड गोवा येथे हे सोन्याचे कडे विक्री करताना संबंधित चोरट्यास पकडले गेले. निलेश विनायक नाईक असे त्याचे नाव आहे. तो सध्या खोर्ली येथे वास्तव्यास आहे.

तर तो मूळचा करंबोळी, ओल्ड गोवा येथील आहे. त्याला न्यायालयाने पोलिस कोठडी सुनावली आहे. पोलिसांनी त्याच्या पत्नीला पोलिसांत हजर होण्याची नोटीस पाठवली आहे. निलेश नाईक याच्याकडून सोन्याचे कडे जप्त करण्यात आले आहे.