जुने गोवे: मानवी तस्करी विरोधी दिनाच्या पूर्वसंध्येला रिवण येथील क्राईम ब्रँचने जुने गोवे येथे एक मोठी कारवाई करत मानवी तस्करीच्या रॅकेटचा पर्दाफाश केला. या गुप्त मोहिमेत पोलिसांनी दोन महिलांची सुटका केली असून एका संघटित गुन्हेगारी जाळ्यावर टाच आणली. या धडक कारवाईमुळे राज्यात अनैतिक व्यवसाय करणाऱ्यांचे धाबे दणाणले आहेत.

बनावट गिऱ्हाईकामार्फत लावला सापळा

क्राईम ब्रँचला एका अज्ञात एजंटकडून महिलांचा लैंगिक शोषणासाठी वापर केला जात असल्याची खात्रीशीर माहिती मिळाली होती. या माहितीची शहानिशा करण्यासाठी पोलिसांनी अत्यंत गोपनीय पद्धतीने सापळा रचला. एका पोलीस कर्मचाऱ्याला 'बनावट गिऱ्हाईक' (Decoy Customer) म्हणून पाठवण्यात आले. एजंटने देहविक्रीसाठी महिलांची सोय करण्याचे मान्य करताच, दबा धरुन बसलेल्या पोलिसांनी छापा टाकून दोन महिलांची (Women) सुटका केली.

बचाव आणि कायदेशीर कारवाई

दरम्यान, या कारवाईनंतर पोलिसांनी भारतीय न्याय संहिता (BNS) आणि अनैतिक मानवी वाहतूक प्रतिबंधक कायदा (ITPA) च्या संबंधित कलमान्वये गुन्हा दाखल केला. सुटका करण्यात आलेल्या दोन्ही महिलांना तातडीने संरक्षण गृहात हलवण्यात आले असून तिथे त्यांना आवश्यक काळजी आणि समुपदेशन (Counselling) दिले जात आहे. त्याचवेळी, या प्रकरणातील मुख्य सूत्रधार आणि इतर एजंटांचा शोध घेण्यासाठी पोलिसांनी तपासाची चक्रे वेगाने फिरवली आहेत.

मानवी तस्करी विरोधात कडक पाऊल

योगायोगाने ही कारवाई 'मानवी तस्करी विरोधी दिना'च्या मुहूर्तावर झाल्याने पोलिसांच्या सतर्कतेचे कौतुक होत आहे. गोव्यातील (Goa) अशा प्रकारच्या अनैतिक व्यापाराचे मूळ शोधून काढण्यासाठी आणि यामागील संघटित गुन्हेगारी नेटवर्क उद्ध्वस्त करण्यासाठी क्राईम ब्रँच विशेष मोहीम राबवत असल्याचे वरिष्ठ अधिकाऱ्यांनी सांगितले.