Goa Crime News: पॉप्युलर फ्रँट ऑफ इंडिया (पीएफआय) या संघटनेवर बंदी घातल्यानंतर बेकायदेशीररित्या वास्तव्य करून असलेल्या बांगलादेशी नागरिकांचा शोध घेण्याची मोहीम सुरू झाली. आतापर्यंत राज्यात 53 बांगलादेशींचा शोध घेण्यात आला असून 4 जणांची मायदेशी रवानगी करण्यात आली आहे. उर्वरितांना 49 जणांना त्यांच्या राहत्या घरी निर्बंध घालून नजरकैदेत ठेवण्यात आले आहे.

गेल्या आठवड्यात जुने गोवे पोलिसांनी करमळी येथे राहत असलेल्या बांगलादेशींना प्रतिबंधात्मक अटक करून त्याची माहिती विदेश क्षेत्रीय नोंदणी विभागाला (एफआरआरओ) दिली आहे. प्रतिबंधात्मक अटक करून त्यांच्याच घरात नजरकैद करण्यात आलेल्यांचा दस्तावेज तपासणीसाठी त्यांनी दिलेल्या पत्त्यावर चौकशीसाठी पाठवण्यात आला आहे.

या चौकशीचा अहवाल आल्यानंतर त्यांना बांगलादेशात पाठवण्याची प्रक्रिया सुरू करण्यात येईल. त्यांनी दिलेल्या पत्त्यावर असलेली कुटुंबे पीएफआयशी संबंधित आहे का याचीही चौकशी करण्यात येत आहे. सध्या त्यांच्या हालचालीवर तसेच ते कामाला असलेल्या ठिकाणी अधूनमधून चौकशी करण्यात येत आहे, अशी माहिती एफआरआरओ अधिकाऱ्यांनी दिली.

म्‍हणून बांगलादेशींना ओळखणे कठीण!

बांगलादेशींचे मुस्लिम बांधवाप्रमाणेच राहणीमान असल्याने त्यांचा शोध घेणे कठीण बनत आहेत. ज्या ठिकाणी मुस्लिमांची वस्ती अधिक आहे, तेथे पोलिस खबऱ्यांमार्फत माहिती मिळवण्याचा प्रयत्न गोवा पोलिसांकडून केला जात आहे.

बांगलादेशींचा शोध घेण्याची मोहीम सुरूच आहे. मात्र, ताब्यात घेऊन कारवाई केलेल्यांच्या दस्तावेजांची माहिती तपासून पाहण्यासाठी वेळ लागत असल्याने त्यांना मायदेशी पाठवण्याची प्रक्रिया रखडली आहे.