मडगाव : महाराष्‍ट्र, तामिळनाडू आणि केरळ या जवळच्‍या तीन राज्‍यांत कोरोनाचे नवीन रुग्‍ण सापडू लागले असतानाच गोव्‍यात वास्‍को येथे एक ७० वर्षीय नागरिक पॉझिटिव्‍ह आढळला आहे. त्‍याला उपचारासाठी गोमेकॉत दाखल करण्‍यात आले आहे.

सध्‍या देशात कोरोनाचे २५७ सक्रिय रुग्‍ण आहेत. दरम्‍यान, गोव्‍यात नवीन रुग्‍ण सापडला म्‍हणून कुणीही घाबरून जाऊ नये. राज्‍यातील जवळपास सर्व नागरिकांनी कोविडची लस टोचून घेतली आहे. त्‍यामुळे लोकांमध्‍ये कोविड प्रतिबंधक क्षमता निर्माण झाली असून साथ पसरणार अशी भीती कुणी बाळगू नये, असे आवाहन साथीच्‍या रोगांचे विभाग प्रमुख डॉ. उत्‍कर्ष बेतोडकर यांनी केले आहे.

केरळमध्ये सर्वाधिक ९५ पॉझिटिव्ह रुग्ण आहेत. तामिळनाडूमध्ये ६६, महाराष्ट्रात ५६ आणि कर्नाटकात १३ रुग्ण आहेत. दरम्यान, मुंबईतील केईएम रुग्णालयात दोन कोविड पॉझिटिव्ह रुग्णांचा मृत्यू झाला.

तथापि, डॉक्टरांचे म्हणणे आहे की त्यांचा मृत्यू कोविडमुळे नाही तर दीर्घकालीन आजारांमुळे झाला. एका रुग्णाला तोंडाचा कर्करोग होता आणि दुसऱ्याला नेफ्रोटिक सिंड्रोम, मूत्रपिंडाशी संबंधित आजार होता.