पणजी: राज्य सरकारने कोविड एसओपीमध्ये सवलत दिल्यापासून गेल्या आठ दिवसांत कोरोनाबाधितांची संख्या झपाट्याने वाढत आहे. त्यामुळे राज्य सरकारला एसओपीमध्ये दिलेल्या ढिलाईबाबत पुन्हा एकदा विचार करण्याची गरज निर्माण झाली आहे.

राज्यात कोरोना नियंत्रणाची परीरिस्थिती असतानासुद्धा, गुरूवारी राज्यात एकही बळी नोंदवला गेला नाही, मात्र कोरोनाबाधितांची संख्या काही कमी होताना दिसत नाही. गेल्या 24 तासांत 976 नवे रुग्ण आढळून आले आहेत. गेल्या चार दिवसांपासून राज्यात रोज शंभरहून अधिक नवे रुग्ण आढळत होते. मात्र काल या रूग्णसंख्येने हजाराचा आकडा गाठला. राज्य सरकारने जवळपास सर्वच गोष्टींना परवानगी दिली आहे. त्यामुळे पर्यटकांची संख्याही गोव्यात झपाट्याने वाढत आहे. आणि नियमांचे सर्रास उल्लंघनही होताना दिसत आहे.

करोनाचे संकट अजूनही असतानाच गोवा राज्य सरकारने सगळे नियम शिथिल केले आहेत, याचाच परिणाम म्हणून करोनाचा आकडा वाढत नाही ना? याचा कुठंतरी सरकारने विचार करायला हवा. आगामी निवडणुकांच्या पार्श्वभूमीवर सतत होणाऱ्या बैठका, सभा, संमेलन या सर्व गोष्टीमध्ये व्यस्त असलेल्या सरकारचे करोनाच्या वाढत्या अकड्याकडे कुठंतरी दुर्लक्ष होताना दिसत आहे.

गोव्यात सर्व काही खुले झाल्याचे कळताच देशी पर्यटकांच्या झुंडीच्या झुंडी गोव्यात दाखल होत आहेत. मोठ्या प्रमाणात गोव्यात दाखल होणाऱ्या पर्यटकांची तपासणी नाक्यावर तपासणी करणे शक्य होत नसल्याचेही कळते. त्यामुळे राज्यात पुन्हा एकदा सक्रिय कोरोनाबाधितांची संख्या वाढत असून आजच्या दिवशी ती 976 झाली आहे. 15 सप्टेंबर रोजी ही संख्या 700 होती. आरोग्य खात्याने दिलेल्या माहितीनुसार, कालपर्यंत 6014 कोरोना चाचण्या करण्यात आल्या.