Goan News: कुठ्ठाळी ग्रामसभेत काल गत सभेच्या अहवालावरून गरमागरम चर्चा झाली. मुद्दा होता कुठ्ठाळीत नवीन बांधलेल्या बाजार संकुल व कचऱ्याचे वर्गीकरण करण्यासाठीच्या जागेचा. हे दोन्ही विषय महत्त्वाचे असतानाही त्यांचा अहवालात कुठेच उल्लेख केलेला नव्हता. शेवटी सरपंच सेनिया परेरा यांनी हस्तक्षेप करून सहा नोव्हेंबरला विशेष ग्रामसभेचे आयोजन करण्याचे आश्वासन दिल्यानंतर संबंधित अहवालाला मान्यता देण्यात आली. (Goan News)

दरम्यान, यावेळी व्यासपीठावर सरपंच सेनिया परेरा, कुठ्ठाळीचे आमदार आंतोन वाझ, उपसरपंच दिव्या रायकर, पंच उज्ज्वला नाईक, एदुसियाना रॉड्रिग्स, रुएला फर्नांडिस, आंजेला फुर्तादो, ओलिंडा लोबो, मेल्बीनो वाझ, मॅन्युएल सिल्वा, फ्रान्सिस फर्नांडिस, मायकल डिसा आणि सचिव कृष्णा गावडे उपस्थित होते.

यावेळी जैवविविधता व्यवस्थापन समिती तसेच ग्रामविकास समितीची निवड, बाजारातील दुकानांचे वाटप, या विषयांवर चर्चा करण्यात आली.

'त्या' गॅरेजचा वाहतुकीला अडथळा

पाजेंतार येथे राष्ट्रीय महामार्गालगत थाटलेल्या गॅरेजमुळे वाहनचालकांची बरीच गैरसोय होत आहे. कुठ्ठाळीत होणारे बेकायदेशीर घर बांधकाम, ट्रेड परवाना, बेशिस्तपणे उभी करण्यात येणारी वेर्णा तिठ्यावरील वाहने, कचरा समस्या, कचरा शुल्क, दंड वसूल करण्यात आलेले अपयश या विषयांवर चर्चा झाली.

दुकाने वितरणाअभावी महसूल घटला

बाजार संकुलातील वितरित न केलेल्या दुकानांमुळे पंचायतीला महसुलावर पाणी सोडावे लागते. वकिलामार्फत लढविण्यात येणारे खटले व वकिलांचे भरमसाट शुल्क या विषयावर गांभीर्याने विचार करावा, अशा सूचना पंचसदस्य आनाक्लेत रॉड्रिग्स, ॲड. टाॅमी कार्व्हालो यांनी केल्या.