पणजी: दिल्ली, हरियाणा, केरळ आणि महाराष्ट्रातील काही परिसरामध्ये कोरोना बाधितांचे प्रमाण वाढत आहे. या पार्श्‍वभूमीवर गोवा राज्यात कोरोनाबाबत इतर निर्बंधांची आवश्यकता नाही. मात्र, कोरोनाबाबत ढिलाई नको. मास्क अनिवार्य करून आवश्यक ती काळजी घ्या असे आवाहन करण्याची सूचना तज्ज्ञ समितीच्या बैठकीत वैद्यकीय क्षेत्रातील तज्ज्ञांनी केली आहे.

मंगळवारी पंतप्रधान नरेंद्र मोदी कोरोनाबाबत देश पातळीवरची आढावा बैठक घेणार आहेत. या पार्श्वभूमीवर आज सोमवारी राज्य सरकारने कोरोना तज्ज्ञ समितीची बैठक बोलावली होती. आरोग्य सचिव रवी धवन यांच्या अध्यक्षतेखाली झालेल्या या बैठकीत गोवा वैद्यकीय महाविद्यालय आणि रुग्णालयाचे डीन डॉ. शिवानंद बांदेकर यांच्यासह अनेक वैद्यकीय तज्ज्ञ उपस्थित होते.

समितीच्या सुचना

मास्क ऐच्छिक न करता अनिवार्य करावेत, पात्र वयोगटातील विशेषता मुलांमधील लसीकरण वाढवावे, विविध आजाराने आजारी असणारे, वयोवृद्ध आणि जोखमीच्या लोकांना कोरोनाचा तिसरा डोस लवकर द्यावा, लसीकरण न घेतलेल्यांना लस घेण्याचे आवाहन करावे, मास्कबंदीचा निर्णय जून-जुलैमध्ये आढावा घेऊन घेतला जाईल.

रुग्णालयांत मास्कशिवाय प्रवेश नाही

राज्यातील शासकीय तसेच खासगी रुग्णालयांमध्ये मास्कशिवाय प्रवेश दिला जात नाही. काही खासगी डॉक्टर यासाठी आग्रही भूमिकेत आहेत. त्यामुळे रुग्णालयात जाताना सर्वांनी मास्क घालूनच जावे. चुकून एखाद्या रुग्णाने मास्क वापरला नसेल तर त्याला डॉक्टरांकडून प्रवेश दिला जात नाही. कोविडचा संसर्ग कमी झाला असला तरी प्रत्येकाने काळजी घेण्याचे आवाहन डॉक्टरांकडून केले जात आहे. 24 तासांत कोरोनामुळे मृत्यू नसल्याने मृत्यूचा आकडा 3,832 कायम आहे.

नवे बाधित - 03

सक्रिय रुग्ण - 26

नागरिकांना कोरोनाची बाधा -2,45,388

रुग्ण आतापर्यंत बरे झाले -2,41,530

रुग्ण बरे होण्याचे प्रमाण -98.43%