पणजी: गोव्यात काँग्रेसने जनतेचा विश्वास गमावलेला आहे. इतर राज्यांच्या व लोकसभा निवडणुकांबाबत काँग्रेसने घेतलेली भूमिका पाहता केंद्रीय स्तरावर आम आदमी पक्ष (आप) इंडिया आघाडीचा घटक राहिलेला नाही. गोव्यात काँग्रेसबरोबर आघाडीची शक्यता नाही, असे आपच्या गोवा प्रभारी तथा दिल्लीच्या माजी मुख्यमंत्री आतिषी यांनी शनिवारी खासगी वृत्तवाहिनीला दिलेल्या मुलाखतीत केला आहे.

आतिषी यांनी यापूर्वीही गोव्यात आप काँग्रेसबरोबर आघाडी करणार नसल्याचे जाहीर केले होते. त्याचाच त्यांनी आताही पुनरुच्चार केल्याने स्थानिक नेत्यांची काँग्रेसबरोबर आघाडी करण्याच्या मनीषाला तडा गेला आहे. कारण मागील वक्तव्यानंतर स्थानिक नेत्यांनी भाजपला पराभूत करायचे झाल्यास सर्व विरोधी पक्षांनी आघाडी करणे गरजेचे असल्याचे म्हटले होते. त्यामुळे आताही मुलाखतीत आतिषी यांनी स्पष्ट भूमिका मांडली आहे.

आतिषी म्हणाल्या, आम आदमी पक्ष गतीने राष्ट्रीय पक्ष म्हणून पुढे चालला आहे. आपने सध्या २०२७ मध्ये पंजाब, गुजरात आणि गोवा या राज्यांतील विधानसभा निवडणुका महत्त्वाच्या आहेत, त्यामुळे आम्ही त्याकडे अधिक लक्ष केंद्रित केले आहे. येथील जनता काँग्रेसवर विश्वास ठेवते, पण ते निवडणून आल्यावर भाजपात जात आहेत.

त्यामुळे कदाचित येथील लोकांना थेट भाजपचेच बटन दाबावे असे वाटत असावे. अधिवेशनात सर्वात जास्त प्रश्न आपच्या आमदारांनी विचारलेले आहेत. राज्यातील सर्वच ठिकाणचे प्रश्न या आमदारांनी मांडले आहेत. दोनच आमदार निवडून आल्यानंतर तेही काही दिवसांत भाजपात जातील, असे म्हटले जात होते, पण ते अजूनही आपबरोबर आहेत. आघाडीचा धर्म हा मोठ्या पक्षाचा असतो, परंतु काँग्रेसने कधीही हा धर्म पाळलेला नाही, असेही त्यांनी नमूद केले.

आठवडाभर मुक्काम

माजी मुख्यमंत्री आतिषी या आगामी स्थानिक स्वराज्य संस्थांच्या आणि २०२७ च्या विधानसभा निवडणुकीच्या पार्श्वभूमीवर पक्षाची संघटना मजबूत करण्यावर गोव्यात काम करीत आहेत. शुक्रवारी त्या गोव्यात दाखल झाल्या असून आठवडाभर त्यांचा गोव्यात मुक्काम राहणार आहे. गावपातळीवर कार्यकर्त्यांच्या भेटी, लोकांच्या समस्या, तसेच मतदारसंघनिहाय बैठका, पदाधिकाऱ्यांच्या बैठका असा त्यांचा आठवड्यात कार्यक्रम राहणार असल्याचे पक्षाच्या सूत्रांनी सांगितले.