सासष्टी : २०२२ पासून गोवा फॉरवर्ड हा काँग्रेसच्या आघाडीचा भाग आहे. विजय सरदेसाई हे अजूनही ते मान्य करतात. मात्र, सध्या या दोन्ही पक्षांमध्ये तणावाचे वातावरण आहे. या पार्श्वभूमीवर काँग्रेसचे खजिनदार दत्ता दामोदर नायक यांनी काँग्रेस व गोवा फॉरवर्ड यांच्यातील युती आवश्यक असल्याचे मत व्यक्त केले.

काँग्रेसच्या खजिनदारपदी नियुक्ती झाल्यानंतर नायक यांनी प्रथमच उघडपणे आपली भूमिका मांडली.

नायक म्हणाले की, केवळ या दोन पक्षांमध्येच नव्हे, तर रिव्होल्युशनरी गोवन्स पक्षाचाही युतीत समावेश होणे आवश्यक आहे. देशातील ‘इंडी’ आघाडीच्या धर्तीवर गोव्यात युतीचा प्रयोग केला, तर भाजपविरोधात प्रभावी लढा देता येऊ शकतो, असेही नायक यांनी सांगितले.

मात्र, हे आपले वैयक्तिक मत असल्याचे त्यांनी स्पष्ट केले.

काँग्रेसनेही लोकांसाठी अनेक लोकोपयोगी योजना राबवल्या आहेत. इंदिरा गांधी यांसारख्या नेत्यालाही पराभवास सामोरे जावे लागले होते. शेवटी लोक प्रशासनामागील हेतूवरून पक्षाची पारख करतात. आता भाजपचा हेतू भ्रष्टाचार असल्याचे लोकांच्या लक्षात आले आहे, असेही नायक म्हणाले.

पक्षबदलूंना लोक धडा शिकवतील

दिगंबर कामत यांच्यासह सर्व पक्षबदलूंना आगामी विधानसभा निवडणुकीत मतदार धडा शिकवतील. पक्ष बदलणे ही गंभीर चूक आहे. पक्षांतर म्हणजे केवळ पक्ष बदलणे नव्हे, तर आपली निष्ठा व तत्त्वे सोडून देण्याचे प्रतीक आहे, असेही नायक यांनी सांगितले.