Goa Congress on Smart City Work Panaji: पणजीतील स्मार्ट सिटीअंतर्गत कामांविषयी काँग्रेसने गुरुवारी निवेदन सादर केले. या निवेदनामागे संबंधित खात्याकडे आपापल्या कायद्यांतर्गत हक्क आहेत, त्याचा वापर करावा.

या प्रशासकीय कार्यालयांना ही कामे दिसत नाहीत काय? याची आठवण करून देण्यासाठी हे निवेदन दिल्याची माहिती काँग्रेसचे नेते एल्विस गोम्स यांनी दिली.

काँग्रेसने पोलिस अधीक्षक, दक्षता आयोग, आरोग्य संचालनालय, पणजी प्राथमिक आरोग्य केंद्र, महानगरपालिका, उपजिल्हाधिकारी यांना निवेदन देण्यात आले आहे. या शिष्टमंडळात गोम्स यांच्यासह ॲड. लवेनिया डिकॉस्ता, जॉन नाझारेथ आदींचा समावेश होता.

गोम्स म्हणाले, स्मार्ट सिटीची 49 कामे शहरात सुरू आहेत. ती कामे कशापद्धतीने सुरू आहेत, हे अनेकांना माहीत नाही. त्यामुळे प्रत्येक खात्याला आठवण करून देण्याचे काम आम्ही केले. या खात्यांना कायद्यांचा वापर करावा.

आरोग्य खात्याने सार्वजनिक आरोग्य कायद्यानुसार पाणी प्रदूषण कसे थांबवावे, लोकांचे आरोग्य कसे सांभाळावे हे पाहावे. तसे होत नाहीय. लोकांचे जीवन धोक्यात असेल, तर अधिकाराचा वापर करता येतो याची आठवण उपजिल्हाधिकाऱ्यांना करून दिली आहे.

गोम्स म्हणाले, महानगरपालिका आपले हात झटकत आहे. आयुक्तही त्यांच्या हक्कांचा वापर करत नाहीयत. अधिकाऱ्यांकडून जे गैरप्रकार घडतात, ते तपासण्याचे हक्क दक्षता आयोगाला आहेत. आम्ही निवेदन देऊन त्यांना ते लक्षात आणून दिले आहे.

अमृत मिशन आणि स्मार्ट सिटी अंतर्गत जी कामे चालू आहेत त्यांचा दर्जा गंभीरपणे तपासला पाहिजे. उद्या काही अघटित घडले, तर आम्हाला माहितीच नाही, असा कांगावा कुणी करू नये. म्हणून हे निवेदने दिल्याचे त्यांनी नमूद केले.