Congress candidate list: गोवा जिल्हा पंचायत निवडणुकीसाठी सत्ताधारी भाजपने आपल्या उमेदवारांची पहिली यादी जाहीर केल्यानंतर, आता काँग्रेस पक्षानेही आपला 'शब्द' पाळत उमेदवारांची पहिली यादी प्रसिद्ध केली आहे. प्रदेशाध्यक्ष अमित पाटकर यांनी आज (२ डिसेंबर) रोजी, उत्तर आणि दक्षिण गोव्यातील निवडक ११ मतदारसंघांतील उमेदवारांची नावे अधिकृतपणे जाहीर केली. या घोषणेमुळे आता दोन्ही प्रमुख पक्षांमध्ये थेट सामना रंगणार असल्याचे स्पष्ट झाले आहे.

उत्तर गोव्यातील ७ उमेदवार निश्चित

उत्तर गोवा जिल्हा पंचायतीसाठी काँग्रेसने पहिल्या टप्प्यात सात उमेदवारांची नावे घोषित केली आहेत. यात महिला आणि आरक्षित जागांवर विशेष लक्ष देण्यात आले आहे.

महिला आरक्षण: कळंगुटमधून कार्मेलीना अँजेला फर्नांडिस, रेईश मागोसमधून सोनल माळवणकर आणि चिंबल येथून अ‍ॅड. शेजल कळंगुटकर यांना संधी मिळाली आहे.

आरक्षित गट: ताळगाव (ST) मतदारसंघातून विजू दिवकर, तर केरी (SC) मतदारसंघातून आयुष सीताराम केरकर यांच्या नावाचा समावेश आहे.

इतर महत्त्वाच्या जागा: सुकूर (General) मतदारसंघातून साहिल म्हांद्रेंकर यांना आणि पाळी (OBC) मतदारसंघातून भानुदास दत्ता सोनाईक यांना उमेदवारी देण्यात आली आहे.

दक्षिण गोव्यातील ४ उमेदवार निश्चित

दक्षिण गोवा जिल्हा पंचायतीसाठी काँग्रेसने पहिल्या यादीत चार उमेदवारांची नावे जाहीर केली आहेत.

आरक्षण: उसगाव-गांजे (महिला) मतदारसंघातून मनीषा उसगावकर आणि सावर्डे (ST) मतदारसंघातून राजेंद्र शिरोडकर यांना उमेदवारी देण्यात आली आहे.

इतर जागा: वेळी (General) मतदारसंघातून ज्युलिओ फर्नांडिस, तर कुर्टी-फोंडा (OBC) मतदारसंघातून अ‍ॅलेक्सिनो दा सिल्वा यांना पक्षाने संधी दिली आहे.

भाजप विरुद्ध काँग्रेस थेट लढत

काँग्रेसने जाहीर केलेल्या यादीमुळे आता अनेक मतदारसंघांत थेट लढत पाहायला मिळणार आहे. उर्वरित मतदारसंघांसाठी काँग्रेस आपल्या उमेदवारांची पुढील यादी लवकरच जाहीर करेल, असे प्रदेशाध्यक्ष अमित पाटकर यांनी सांगितले.