Colvale Police: थिवी येथील गणेश मंदिराजवळ खेळत असताना बेपत्ता झालेल्या 3 मुलांना शोधून काढण्यात पोलिसांना यश आलंय.

पोलीस इन्स्पेक्टर विजय राणे यांच्या नेतृत्वाखाली कोलवाळ पोलिसांनी बेपत्ता झालेली 5 वर्षांची दोन जुळी मुले आणि 8 वर्षांच्या एका मुलीला शोधून काढत पालकांच्या हवाली केलंय. ही मुले खेळत असताना रस्ता चुकल्याने बेपत्ता झाल्याची माहिती मिळाली आहे.

या घटनेसंबंधी मिळालेली माहिती अशी की, थिवी येथील गणेश मंदिराजवळ खेळणाऱ्या ३ मुली अचानक गायब झाल्याचा फोन पणजी येथील पोलीस नियंत्रण कक्षाला गुरुवारी सकाळच्या सुमारास आला. पोलिसांनी घटनेची त्वरित दाखल घेत कोलवाळ पोलीस स्टेशनला सर्व माहिती पुरवली.

कोलावळ पोलीस इनस्पेक्टर विजय राणे यांच्या नेतृत्वाखाली पोलीस उपनिरीक्षक रोहन मडगावकर यांच्यासोबत पोलीस दलातील सदा परब, संदिप मलिक, निखिल नाईक आणि एचसी रुपेश कोरगावकर, शिल्पा शेटगावकर तसेच पीसीआर व्हॅन आणि पिंक फोर्स घटनास्थळी रवाना झाले.

दरम्यान मंदिरानजीकच्या भागात पोलिसांनी शोध कार्य सुरु केल्यावर हरवलेल्या मुली थिवी-धानवाच्या आजूबाजूच्या घनदाट झाडीमध्ये सापडल्या. सध्या या मुली सुखरूप असून पोलिसांनी त्यांना त्यांच्या कुटुंबियांकडे सुपूर्द केलेय.