म्हापसा: नोकरी देण्याचे आमिष दाखवून १८ वर्षीय तरुणाला निर्जन ठिकाणी नेऊन, चाकूचा धाक दाखवत लुटल्याप्रकरणी कोळवाळ पोलिसांनी एका २९ वर्षीय तरुणाला अटक केली.सुभाष कुमार (वय २९, रा. कारासवाडा, मूळचा उत्तर प्रदेश) असे अटक करण्यात आलेल्या युवकाचे नाव आहे.

विशेष म्हणजे, मार्च २०२५ मध्ये पिळर्ण येथे घडलेल्या २४ लाख रुपयांच्या दरोडा प्रकरणातही हा आरोपी सामील होता, अशी माहिती पोलिसांनी दिली आहे. तो सध्या जामिनावर बाहेर होता. याप्रकरणी अमित कुमार (रा. हणजूण, मूळ रा. सीतामढी, बिहार) या तरुणाने कोळवाळ पोलीस ठाण्यात तक्रार नोंदवली आहे.२३ जुलै रोजी सायंकाळी ४.३० वाजताच्या सुमारास कोळवाळ येथे ही घटना घडली.

नोकरी लावण्याच्या बहाण्याने दोघांनी अमितला बसने आधी बागा–कळंगुट परिसरात नेले. त्यानंतर त्याला पुन्हा बसने कोळवाळ येथे आणून झाडीतील एका निर्जन ठिकाणी घेऊन गेले. तिथे आरोपींनी त्याला मारहाण केली आणि सुऱ्याचा धाक दाखवून त्याच्याजवळील १८ हजार रुपये किमतीचा मोबाईल हिसकावून घेतला. एवढेच नाही, तर पीडित तरुणाच्या मोबाईलमधील पेमेंट अॅपचा वापर करून ९,५०० रुपये एका अज्ञात खात्यात ट्रान्सफर करून घेतले.

सहा दिवसांची कोठडी

तक्रार दाखल होताच कोलवाळ पोलिसांनी तत्परतेने तपासचक्र फिरवत आरोपी सुभाष कुमार याला अटक केली असून त्याच्याकडून चोरीला गेलेला मोबाईल जप्त केला आहे. आरोपीला म्हापसा न्यायालयासमोर हजर केले असता न्यायालयाने त्याला सहा दिवसांची पोलीस कोठडी सुनावली आहे. या गुन्ह्यात सहभागी असलेल्या इतर आरोपींचा शोध आणि पुढील तपास कोळवाळ पोलीस करत आहेत.