पणजी: कुळे येथे असलेल्या दूधसागर नदीपात्रात पोहण्यासाठी गेलेल्या चार आयआयटी विद्यार्थ्यांचा बुडून मृत्यू झाल्याची अत्यंत हृदयद्रावक घटना समोर आली. मृतांमध्ये तीन सख्ख्या भावांचा समावेश असल्याचे प्राथमिक वृत्तातून समजते. या घटनेमुळे परिसरात शोककळा पसरली असून शैक्षणिक क्षेत्रातून हळहळ व्यक्त केली जात आहे.

मिळालेल्या माहितीनुसार, वास्को येथील आयआयटीमध्ये शिक्षण घेणारे हे विद्यार्थी सुट्टीचा आनंद घेण्यासाठी रेल्वेने वास्को (Vasco) ते कुळे असा प्रवास करुन आले होते. कुळेमधील मेतवाडा येथील दूधसागर नदीत हे विद्यार्थी पोहण्यासाठी उतरले होते. मात्र, पाण्याचा अंदाज न आल्याने आणि प्रवाहाचा वेग जास्त असल्याने हे चारही विद्यार्थी पाण्यात अडकले आणि दुर्दैवाने त्यांचा बुडून मृत्यू झाला.

घटनेची माहिती मिळताच स्थानिक पोलीस आणि आपत्ती व्यवस्थापन पथकाने घटनास्थळी धाव घेतली. काही तासांच्या शोधकार्यानंतर या चारही विद्यार्थ्यांचे मृतदेह बाहेर काढण्यात यश आले. या घटनेमुळे संपूर्ण गोव्यात खळबळ उडाली. हे विद्यार्थी नक्की कुठले आहेत आणि त्यांच्या सोबत आणखी किती मित्र होते, याबाबतची सविस्तर माहिती अद्याप पोलीस प्रशासनाकडून प्रतीक्षाधीन आहे.

दूधसागर नदी आणि परिसरातील जलस्त्रोत पर्यटकांसाठी आणि स्थानिकांसाठी आकर्षणाचे केंद्र आहेत. मात्र, पावसाळ्याच्या तोंडावर किंवा नदीच्या खोल पात्रात योग्य खबरदारी न घेता पोहणे जीवावर बेतू शकते, हे या घटनेतून पुन्हा एकदा अधोरेखित झाले. विद्यार्थी आणि तरुणांनी अशा ठिकाणी जाण्यापूर्वी सुरक्षेच्या सर्व नियमांचे पालन करावे, असे आवाहन प्रशासनाकडून करण्यात येत आहे.