Goa College Student Boycott Class: गोवा कॉलेज ऑफ आर्किटेक्चरच्या विद्यार्थ्यांनी कौन्सिल ऑफ आर्किटेक्चर अंतर्गत नोंदणी क्रमांक न दिल्याच्या निषेधार्थ वर्गावर बहिष्कार टाकला. जवळपास वर्षभरापासून हा प्रश्न प्रलंबित आहे.

विद्यार्थ्यांनी याबाबत वारंवार कॉलेज प्रशासनाकडे विचारणा केली होती, असे समजते. अंतिम वर्षाच्या विद्यार्थ्यांना जे आता उत्तीर्ण होऊन जाणार आहेत, त्यांना या नोंदणी क्रमांकाची खूप गरज असणार आहे. तो नोंदणी क्रमांक नसेल तर त्यांची अडचण होऊ शकते.

दरम्यान, आज सोमवारीदेखील विद्यार्थी प्राचार्यांकडे ही समस्या घेऊन गेले होते. तथापि, प्राचार्य विद्यार्थ्यांना भेटलेच नाहीत. COA कडे पाठपुरावा न केल्याचा आरोप विद्यार्थ्यांनी कॉलेजवर केला आहे.

हा नंबर एकप्रकारे आर्किटेक्टच्या विद्यार्थ्यांसाठी सनद सारखा काम करतो. म्हणजे जर हा नोंदणी क्रमांक नसेल त्यांना स्वतंत्रपणे काम करता येत नाही. त्यांना एखाद्या आर्किटेक्टच्या हाताखाली काम करावे लागेल.

कॉलेजमध्ये एकूण 250 विद्यार्थी आहेत. त्यापैकी 50 हून अधिक विद्यार्थ्यांना हा नोंदणी क्रमांक मिळालेला नाही. शिवाय ज्यांना हा नंबर दिला गेला आहे तो देखील रँडम पद्धतीनुसार दिला गेला आहे. त्यामुळे टॉप टेनमधील विद्यार्थ्यांकडेही हा नंबर नाही. त्यामुळे विद्यार्थ्यांची मोठी गैरसोय होणार आहे.