पणजी: गोव्याच्या किनारी भागात आढळणाऱ्या ‘कॉलर्ड किंगफिशर’च्या संवर्धनासाठी मिनरल फाउंडेशन ऑफ गोवा (एमएफजी) आणि गोवा बर्ड कन्झर्वेशन नेटवर्क (जीबीसीएन) यांच्या संयुक्त विद्यमाने संशोधन प्रकल्प सुरू करण्यात आला आहे. या माध्यमातून पक्ष्याचे वितरण, लोकसंख्येतील बदल, अधिवास आणि संवर्धनासमोरील आव्हानांचा अभ्यास केला जाणार आहे.

‘पॉप्युलेशन डायनॅमिक्स, डिस्ट्रिब्युशन अँड कन्झर्वेशन कन्सर्न्स ऑफ द कॉलर्ड किंगफिशर इन गोवा’ असे प्रकल्पाचे नाव असून, ‘टोडिरॅम्फस क्लोरिस’ या शास्त्रीय नावाने ओळखला जाणारा हा पक्षी पश्चिम किनारपट्टीवर आढळतो. गेल्या दोन दशकांत गोव्यात त्याच्या दर्शनाच्या नोंदी झाल्याने त्याला राज्याच्या दृष्टीने विशेष संवर्धन महत्त्व प्राप्त झाले आहे.

नोंदी कळविण्‍याचे नागरिकांना आवाहन

स्थानिक नागरिक, मच्छीमार, पक्षीनिरीक्षक, छायाचित्रकार, निसर्गप्रेमी आणि किनारी भागातील रहिवाशांचा सहभाग महत्त्वाचा असल्याचे प्रकल्पाचे प्रमुख संशोधक पराग रांगणेकर यांनी सांगितले. खारफुटी, खाड्या, कालवे किंवा अन्य किनारी भागांत कॉलर्ड किंगफिशर दिसल्यास त्याची माहिती संशोधन पथकाला देण्याचे आवाहन करण्यात आले आहे.