Sulakshana Sawant In Karnataka: कर्नाटकची विधानसभा निवडणूक जवळ आली असून, त्यासाठी भाजप जोरदार प्रचार करत आहे. देशाचे पंतप्रधान, गृहमंत्री यांच्यासह भाजपच्या प्रमुख नेत्यांनी कर्नाटकमध्ये भाजपसाठी प्रचार सभा घेतल्या आहेत. कर्नाटकचा शेजारी गोव्यातील भाजप नेते देखील पक्षासाठी प्रचार करत आहेत.

काही दिवसांपूर्वी मुख्यमंत्री सावंत (Goa CM Pramod Sawant) यांनी भाजपसाठी कर्नाटकमध्ये प्रचार केला. त्यानंतर त्यांच्या पत्नी यांनी देखील पक्षासाठी प्रचारात उडी घेतली आहे.

मुख्यमंत्री प्रमोद सावंत यांच्या पत्नी सुलक्षणा सावंत (Sulakshana Sawant) यांनी कर्नाटकमधील खानापूर विधानसभा मतदारसंघात प्रचाराचा शुभारंभ केला. त्यांनी मतदार संघातील भाजप कार्यकर्त्यांशी संवाद साधला. "खानापूर मतदारसंघाची जबाबदारी माझ्या खंद्यावर असल्याचा मला अभिमान आहे. आम्हाला खात्री आहे की उमेदवार विठ्ठल हलगेकर जिंकणारच." असे ट्विट सुलक्षणा सावंत यांनी केले आहे.

यावेळी सुलक्षणा सावंत यांनी ज्येष्ठ कार्यकर्ता यांच्या उपस्थितीत मंडळ कार्यकर्ता, महाशक्ती केंद्र आणि शक्ती केंद्र प्रमुख यांच्या समवेत झालेल्या बैठकीला संबोधित केले.

कर्नाटकात प्रचारासाठी गोव्यातून जाणार नेत्यांची मोठी फौज

कर्नाटकातील विधानसभा निवडणुकीत प्रचारासाठी गोव्यातून भाजपने नेत्यांची फौजच जाणार आहे. मुख्यमंत्री प्रमोद सावंत हे भाजपचे स्टार प्रचारक असणार आहेत.

तर आरोग्यमंत्री विश्‍वजीत राणे यांच्यासह सार्वजनिक बांधकाममंत्री नीलेश काब्राल, वाहतूकमंत्री माविन गुदिन्हो, जलस्रोतमंत्री सुभाष शिरोडकर हेही प्रचारासाठी जाणार असल्याची माहिती सूत्रांनी दिली. राष्ट्रीय अध्यक्ष जे. पी. नड्डा यांनी या पक्षीय जबाबदाऱ्या जाहीर केल्या आहेत.

याशिवाय भाजपकडून माविन गुदिन्हो, सुभाष शिरोडकर, ॲड. नरेंद्र सावईकर, दामू नाईक, आमदार मायकल लोबो, प्रेमेंद्र शेट, उल्हास तुयेंकर, दाजी साळकर, प्रवीण आर्लेकर, केदार नाईक आणि माजी आमदार सिद्धार्थ कुंकळ्येकर हे नेते प्रचारासाठी कर्नाटकमध्ये जाणार असल्याची माहिती पक्षाच्या सूत्रांनी दिली.