पुणे: गोव्याचे मुख्यमंत्री डॉ. प्रमोद सावंत यांच्या प्रकृतीबाबत पुणे येथील प्रसिद्ध रुबी हॉल क्लिनिकच्या वतीने अधिकृत माहिती देण्यात आली असून त्यांना सध्या याच रुग्णालयात उपचारासाठी दाखल करण्यात आले आहे. रुबी हॉल क्लिनिकचे मुख्य हृदयरोगतज्ज्ञ, अध्यक्ष आणि व्यवस्थापकीय विश्वस्त डॉ. परवेझ ग्रँट यांनी दिलेल्या माहितीनुसार, मुख्यमंत्री सावंत यांच्यावर गुरुवारी (19 मार्च) यशस्वीरित्या 'अँजिओप्लास्टी' शस्त्रक्रिया पार पडली. अचानक छातीत दुखू लागल्याने त्यांना तातडीने पुण्यातील रुबी हॉल क्लिनिकमध्ये दाखल करण्यात आले होते, जिथे तज्ज्ञ डॉक्टरांच्या मार्गदर्शनाखाली त्यांच्यावर पुढील उपचार सुरु करण्यात आले.

ही संपूर्ण वैद्यकीय प्रक्रिया कोणत्याही गुंतागुंतीशिवाय पार पडली. डॉ. ग्रँट यांनी दिलेल्या माहितीनुसार, शस्त्रक्रियेनंतर मुख्यमंत्री सावंत यांची प्रकृती सध्या पूर्णपणे स्थिर असून त्यांच्या प्रकृतीत सुधारणा होत आहे. डॉक्टरांच्या एका विशेष पथकाच्या देखरेखीखाली त्यांना सध्या 'ऑब्झर्व्हेशन'मध्ये ठेवण्यात आले असून त्यांच्या प्रकृतीतील बदलांवर बारकाईने लक्ष ठेवले जात आहे.

मुख्यमंत्री डॉ. प्रमोद सावंत यांना अचानक छातीत दुखू लागल्याने पुण्यात हलवण्यात आले होते. त्यानंतर तात्काळ रुबी हॉल क्लिनिकमधील तज्ज्ञ डॉक्टरांच्या मार्गदर्शनाखाली त्यांच्यावर उपचार सुरु करण्यात आले. डॉ. परवेझ ग्रँट यांनी मुख्यमंत्री सावंत यांच्या प्रकृतीत होत असलेल्या सकारात्मक सुधारणेबद्दल समाधान व्यक्त केले.