Mahadayi Water Dispute: म्हादई नदी वाचविण्यासाठी शक्य त्या सर्व गोष्टी करण्‍यात आल्‍या आहेत आणि केल्‍या जात आहेत. म्हादई ही समस्‍त गोमंतकीयांची माता आहे. कुठल्याच परिस्थितीत म्हादई वळवली जाणार नाही असे मुख्‍यमंत्री डॉ. प्रमोद सावंत यांनी सांगितले.

गोवा महिला पुरस्काराचे वितरण मुख्‍यमंत्री डॉ. सावंत यांच्या हस्ते करण्यात आले. यावेळी ‘जीवनगौरव’ पुरस्काराने सन्मानित गोव्यातील जगप्रसिद्ध गायिका हेमा सरदेसाई यांनी म्हादईबाबत विचारलेल्या प्रश्नाला मुख्यमंत्र्यांनी उत्तर दिले.

उद्‌घाटन समारंभात मुख्यमंत्र्यी म्हणाले, "रीबिल्ड इंडिया ट्रस्टने पुढील दोन महिन्यांत संपूर्ण गोव्यात विविध कार्यक्रमांचे आयोजन केले आहे. पुरस्कार प्राप्त महिलांकडून प्रेरणा घेवून इतर महिलांनी विवीध क्षेत्रात काम करु शकतात. गोवा सरकारने 2007 मध्ये महिला शक्ती अभियानाला सुरुवात केली."

"पंचायत आणि नगरपालिका क्षेत्रात 33 टक्के आरक्षण बाजूला सारून महिला निवडून येत आहेत. याचे श्रेय त्यांनाच जाते. यावेळी मुख्यमंत्र्यांनी पुरस्कार प्राप्त महिलांचे अभिनंदन केले. महिलांच्या सहभागामुळे पंतप्रधान नरेंद्र मोदी यांचा ‘स्वच्छ भारत’ उपक्रम यशस्वी झाला व ‘स्वयंपूर्ण गोवा’ मिशनही यशस्वी होत आहे.

गोवा पंचायत महिला शक्ती अभियानातर्फे आयोजित गोवा स्टार महिला पुरस्कार : 2023 हा कौतुकास्पद उपक्रम आहे" असे मुख्यमंत्री डॉ. सावंत यांनी सांगितले.