Archbishop Filipe Neri Cardinal Ferrao धार्मिक भावना दुखावणाऱ्यांच्या विरोधात कारवाई करू, असा इशारा मुख्यमंत्री डॉ. प्रमोद सावंत यांनी दिल्यावर 24 तासांतच आर्च बिशप फिलीप नेरी फेर्रांव यांनी संबंधित ख्रिस्ती धर्मगुरूंना असे प्रकार करू नये, अशी सक्त ताकीद दिली आहे.

बिशप पॅलेसमधून ही माहिती प्रसारित करण्यात आली. यापूर्वी असा प्रकार घडूनही आर्च बिशपांनी त्याबाबत मौन बाळगणे पसंत केले होते. मात्र, मुख्यमंत्र्यांनी कोणीही, कुठेही असे वक्तव्य केले तरी त्याला पाठीशी घालणार नाही, असा स्पष्ट संदेश दिल्यावर चर्चला भूमिका स्पष्ट करावी लागली.

चर्चमध्ये प्रवचन करताना इतर धर्मियांच्या धार्मिक भावना दुखावल्याच्या प्रकरणाची अखेर आर्च बिशपांनी दखल घेतली आहे.

असे कृत्य केलेल्या ख्रिस्ती धर्मगुरूंना भविष्यात असे प्रकार न करण्याची ताकीद दिली असून पूर्ण ख्रिस्ती समुदायाने इतरांच्या धार्मिक भावना दुखावणारे वक्तव्य करू नये किंवा कृती करू नये, असे आवाहन बिशप पॅलेसच्या पत्रकात केले आहे.

चर्चने केली भूमिका स्पष्ट

चर्चने पत्रकात नमूद केले आहे की, आम्हाला मनापासून खेद वाटतो की, चर्चच्या काही सदस्यांनी अलीकडील काही घोषणा आंतरधर्मीय संवाद आणि परस्पर आदराच्या अस्सल भावनेच्या विरोधात गेल्या आहेत.

आम्ही खात्री देऊ इच्छितो की, चर्चच्या नेतृत्वाने त्यांच्या संदर्भात योग्य ती कारवाई केली आहे आणि भविष्यात असे उच्चार टाळण्याबद्दल त्यांना कडक ताकीद दिली आहे.

‘ती’ विधाने दुर्दैवी : चर्चच्या काही सदस्यांनी अलीकडेच सार्वजनिकपणे वापरलेल्या काही विशिष्ट अभिव्यक्तींमुळे इतर धार्मिक परंपरांच्या लोकांच्या धार्मिक भावना दुखावल्या गेल्या आहेत, हे दुःखदायक आहे. इतर धर्मांबाबत चर्चची भूमिका स्पष्ट करण्यासाठी हे विधान जारी केले आहे.