CM Pramod Sawant देशात होणाऱ्या आगामी निवडणुकांच्या पार्श्वभूमीवर भाजप पक्षाने मोर्चेबांधणी सुरु केली असून सध्या गोव्याचे मुख्यमंत्री, आरोग्यमंत्री यांच्यासह प्रदेशाध्यक्ष देशातल्या निरनिराळ्या भागात पक्ष बांधणीच्या उद्देशाने दौरे करत आहेत.

भाजप हा राष्ट्रीय पक्ष असल्याने निवडणूक असलेल्या राज्यात नेते, आमदार, कार्यकर्ते संघटनात्मक कामासाठी जात असून सध्या राज्याचे मुख्यमंत्री प्रमोद सावंत छत्तीसगडमध्ये पक्षाच्या कामासाठी गेले आहेत.

छत्तीसगडमध्ये या अगोदर काँग्रेसने सरकार स्थापन केले होते. त्यावेळी काँग्रेसने प्रचारादरम्यान दारूबंदीच्या मुद्द्यावर जनतेचा विश्वास संपादन करत सत्ता स्थापन केली होती.

सध्या छत्तीसगडमध्ये काँग्रेस आणि भाजप पक्ष निवडणुकीच्या रिंगणात असून गोव्याचे मुख्यमंत्री तेथील उमेदवाराचं पारडं जड होण्याच्या दृष्टीने प्रयत्नशील आहेत.

याच दरम्यान त्यांनी स्थानिक पत्रकारांशी संवाद साधला. त्यावेळी एका पत्रकाराने विचारलेल्या प्रश्नावरून मुख्यमंत्र्यांवर अचंबित होण्याची वेळ आली.

थोडक्यात घडलं असं की, पत्रकार परिषदेदरम्यान एका पत्रकाराने प्रमोद सावंत यांना विचारले की, ''छत्तीसगडचे सध्याचे काँग्रेसचे सरकार राज्यात दारूबंदीच्या आश्वासनामुळे जिंकून आले होते. निवडणुकीत दारूबंदी हा महत्त्वाचा मुद्दा ठरू शकतो. याच पार्श्वभूमीवर तुम्ही देखील दारूबंदी करणार का’? हा प्रश्न ऐकून मुख्यमंत्री डॉ. सावंत अचंबित झाले.

ते म्हणाले, ‘भाईसाहब, गोवा एक टुरिस्टिक स्टेट है’. यावर तो पत्रकार लगेच म्हणाला, ‘मी गोव्याविषयी नाही तर छत्तीसगडविषयी बोलत आहे.’ पत्रकाराच्या या विधानावर मुख्यमंत्र्यांना हसू आवारणे कठीण झाले. पण खुमासदार उत्तर देत सावंत म्हणाले, ‘आम्ही लवकरच छत्तीसगडचे घोषणापत्र जारी करू’.