पर्वरी: गोव्याचे मुख्य सचिव पुनीतकुमार गोयल यांनी हळदोणा येथे २.६ कोटींना १,८७५ चौरस मीटर जमीन खरेदी केली आहे. सदर जमीन 'रुपांतरीत' आहे आणि त्या प्रक्रियेत सनदी अधिकारी म्हणून गोयल यांचा सहभाग होता.

हे नैतिकदृष्ट्या अयोग्य असून, हा भ्रष्टाचार आहे, असा आरोप करत आज काँग्रेसने गोयल यांना घेराव घालण्यासाठी सचिवालयाकडे धाव घेतली. पोलिसांनी संतप्त कार्यकर्त्यांना रोखले, यावेळी झटापटही झाली.

गोयल यांचे जमीन खरेदी प्रकरण वादाच्या भोवऱ्यात सापडले आहे. उपलब्ध माहितीनुसार, 'रूपांतरीत' जमिनीचा व्यवहार १८ मे रोजी झाला.

काँग्रेसने केलेल्या दाव्यानुसार, जमीन रूपांतरणाच्या फाइलवर मुख्य सचिवांनी जमीन खरेदी करण्यापूर्वी स्वाक्षरी केली आहे, जे आक्षेपार्ह आहे

पुनीत कुमार गोयल यांनी हळदोणे येथील सर्वेक्षण क्र. ३६/१ वरील भूखंड कलम १७/२ अन्वये रुपांतरीत केला. हा प्रकार भ्रष्टाचाराचा भाग असून, त्यांनी पदावरून तत्काळ पायउतार व्हावे, अशी जोरदार मागणी करण्यात आली आहे.

व्हिडिओ व्हायरल

गोयल यांच्या जमीन खरेदीसंदर्भात एक व्हिडिओ सोशल मीडियावर व्हायरल झाला. त्यानंतर विविध स्तरांतील घटकांमधून याविषयी नाराजी व्यक्त करण्यात येत आहे. सरकारने उपरोक्त विषयी स्पष्टीकरण द्यावे, अशी मागणी करण्यात आली आहे.

1) काँग्रेसने सचिव १ मुख्य गोयल यांना घेराव घालण्याचे आज सकाळी सुतोवाच केले. त्यानुसार दुपारनंतर सचिवालयाबाहेर काँग्रेस कार्यकर्ते जमा झाले.

2) त्यांनी सचिवालयात जाण्याचा प्रयत्न केला. परंतु तत्पूर्वीच चोख पोलिस बंदोबस्त ठेवण्यात आला होता. पोलिसांनी काँग्रेस कार्यकर्त्यांना रोखले.

3) यावेळी प्रदेशाध्यक्ष अमित पाटकर व त्यांच्या सहकाऱ्यांनी जोरदार घोषणाबाजी केली. किरकोळ झटापटही झाली.