पणजी: गोविंद गावडे यांना राज्य मंत्रिमंडळातून डच्चू दिल्यानंतर गोव्यातील राजकीय घडामोडींना वेग आला आहे. यातच आता, कला अकादमीच्या जबाबदारीतूनही मुक्त करुन सावंत सरकारने गावडे यांना आणखी एक मोठा दणका दिला. कला अकादमीच्या अध्यक्षपदाची जबाबदारी आता मुख्यमंत्री डॉ. प्रमोद सावंत यांनी स्वत: हाती घेतली. हा निर्णय तात्काळ प्रभावाने लागू करण्यात आला असून पुढील आदेश येईपर्यंत मुख्यमंत्री स्वतःच या पदाची जबाबदारी पार पाडतील.

मुख्यमंत्री कार्यालयाकडून अधिकृत पत्रक जारी करण्यात आले असून त्यात म्हटले आहे की, गोविंद गावडे यांच्याकडे असलेली कला अकादमीची जबाबदारी मुख्यमंत्र्यांकडे सोपवण्यात आली आहे.

गोविंद गावडे हे कला, संस्कृती, क्रीडा आणि युवा सेवा विभागाचे मंत्री होते. त्यांच्या कार्यकाळात काही महत्त्वाचे निर्णय घेतले गेले असले तरी मागील काही महिन्यांपासून त्यांच्याविरुद्ध नाराजीचे वातावरण होते, असे सूत्रांकडून समजते. दरम्यान, या राजकीय घडामोडीमुळे गोव्यातील सत्तास्थितीवर पुन्हा एकदा चर्चा रंगली आहे. मुख्यमंत्री डॉ. प्रमोद सावंत यांच्याकडे आधीच अनेक खात्यांची जबाबदारी असून त्यात आता कला अकादमीसारख्या महत्त्वाच्या संस्थेची जबाबदारीही त्यांच्यावर येऊन पडली आहे.

दुसरीकडे, गोविंद गावडे यांना देण्यात आलेल्या डच्चूचे अधिकृत कारण अद्याप समोर आलेले नसले, तरी भाजप पक्षांतर्गत सुरु असलेल्या हालचालींचा परिणाम म्हणून या निर्णयाकडे पाहिले जात आहे.