धारबांदोडा : धारबांदोडा पंचायतीतर्फे (Dharbandoda Panchayat) पंचायत निधीतून दावकोण, धुलैय, ओकांब व धडे या भागातील पूरग्रस्त (Flood) कुटुंबांना (Families) धनादेशांचे वितरण (Check Distribution) करण्यात आले आहे. सुमारे ८३ पूरग्रस्तांना एकूण तीन लाख रुपयांचे (Three Lakh Rupees) वितरण करण्यात आले. पूरग्रस्तांना आर्थिक मदत करण्याचा पहिला मान हा धारबांदोडा पंचायत मंडळाला जात आहे. सरकार पातळीवर पूरग्रस्तांना सर्वतोपरी मदत करण्यात येत आहे. पूरग्रस्ताना मदत करण्यासाठी धारबांदोडा पंचायतीने सर्वप्रथम प्रस्ताव सादर केला. त्यानंतर त्याला उच्च पातळीवरून मान्यता देण्यात आली, असे धारबांदोडा गटविकास अधिकारी मिलिंद वेळीप (Milind Velip) यांनी सांगितले

दावकोण येथील श्री रवळनाथ जल्मी देवस्थानच्या सभागृहात या कार्यक्रमाचे आयोजन करण्यात आले होते. व्यासपीठावर सरपंच स्वाती तिळवे, पंच सदस्य विनायक ऊर्फ बालाजी गावस, यशवंत बांदोडकर, दत्तराज गावस, सुनिता गावकर, परेश खुटकर, पंचायत सचिव सोमनाथ तारी उपस्थित होते. सध्या ऑक्ट्रॉय येणे बंद झाल्याने पंचायती आर्थिक संकटात आहेत. तरीही पंचायत मंडळाने पूरग्रस्तांना मदत करण्याचा निर्णय घेतला. याला पंचायत संचालकांनी गटविकास अधिकाऱ्यांना सूचना करून मान्यता देण्यात आली. यासाठी आपण पंचायत संचालक व गटविकास अधिकाऱ्यांचा आभारी आहे, असे पंच सदस्य विनायक गावस सांगितले. भूमिपुत्र विधेयकाबद्दल विचारल्यानंतर विनायक गावस म्हणाले, की या विधेयकाबद्दल आपल्याला पूर्ण माहिती नाही. त्यामुळे यावर भाष्य करणे योग्य नाही. सरकारने धारबांदोडा तालुक्यातील कुमेरी, आफ्रामेंत व वनहक्क कायद्याखाली देण्यात येणाऱ्या जमिनीच्या सनदा नागरिकांना लवकर द्याव्यात, अशीही मागणी त्यांनी केली. सुनिता गावकर यांनी स्वागत, यशवंत बांदोडकर यांनी सूत्रसंचालन, तर स्वाती तिळवे यांनी आभार मानले.