Bank Fraud कर्जासाठी बँकेकडे गहाण ठेवलेली स्थावर मालमत्ता कटकारस्थान रचून तिची परस्पर विक्री करून बँकेची 9.37 कोटींची फसवणूक केल्याच्या प्रकारामुळे खळबळ उडाली आहे.

याप्रकरणी आर्थिक गुन्हे कक्षेच्या पोलिसांनी बेतकी-खांडोळा येथील मे. शांती ॲग्रो इंडस्ट्रीज कंपनीचे चार भागीदार तसेच खरेदीदार मिळून पाचजणांविरुद्ध गुन्हा दाखल केला आहे.

पोलिसांनी दिलेल्या माहितीनुसार, कॅनरा बँकेच्या एआरएम शाखेचे व्यवस्थापक तथा ॲटर्नी नागेश्‍वर बिक्शपथी यांनी या कंपनीविरुद्ध फसवणुकीची तक्रार पोलिसांत दाखल केली होती.

पोलिसांनी फसवणूक, कट-कारस्थानच्या आरोपाखाली संशयिताविरुद्ध गुन्हा नोंद केला आहे. संशयितांना चौकशीसाठी बोलावण्यात येणार असल्याची माहिती या कक्षेच्या पोलिस अधिकाऱ्यांनी दिली.

पोलिसांनी दाखल केलेल्या गुन्ह्यामध्ये मे. शांती इंडस्ट्रीज कंपनीचे भागीदार असलेल्या संशयित शांती सुरेंद्र कामथ, अर्बेतू सुरेंद्र कामथ, आशिष सुरेंद्र कामथ, मैत्री सुरेंद्र कामथ आणि भानुदास वझे यांचा समावेश आहे.

शांती आणि अर्बेत हे कंपनीचे संचालक आहेत, तर आशिष कामथ, मैत्री कामथ हे भागीदार आहेत. भानुदास याने कामथ यांच्याकडून बँकेकडे गहाण असलेली मालमत्ता खरेदी केली आहे.

ही मालमत्ता बँकेकडे तारण असल्याची माहिती खरेदीदाराला असूनही त्याने ती खरेदी केली. त्यासंदर्भातील नोंदणी फोंडा निबंधकांकडे केली आहे. त्यामुळे संशयितांनी बँकेचा विश्‍वासघात करत फसवणूक केल्याचे पोलिस तक्रारीत नमूद केले आहे.