Goa Tourism News: काणकोण सारख्या गोव्याच्या दक्षिणेकडील तालुक्यात आध्यात्मिक पर्यटनाला भरपूर वाव असून राज्य सरकारच्या अशा एखाद्या पर्यटनाभिमुख प्रकल्पाला सर्वतोपरी सहकार्य करण्याचे आश्वासन श्री गोकर्ण पर्तगाळी जीवोत्तम मठाचे स्वामी श्रीमद् विद्याधीशतीर्थ श्रीपाद वडेर स्वामी यांनी पर्यटनमंत्री रोहन खंवटे यांना दिले.

पर्यटनमंत्री रोहन खंवटे यांनी अलीकडेच पर्यटन विकासाच्या हेतूने तेथील महत्त्वाच्या स्थळांची माहिती प्रत्यक्ष जाणून घेण्यासाठी केलेल्या काणकोण दौऱ्यावेळी पर्तगाळ येथील मठाला सदिच्छा भेट देऊन स्वामीजींचे आशीर्वाद घेतले. त्यावेळी स्वामीजींनी राज्य सरकारच्या विकास प्रयत्नांना सहकार्य करू, असे सांगितले.

पर्तगाळ येथील मठात विविध धार्मिक कार्यक्रम सातत्याने होत असतात. या मठाला महान गुरू परंपरा लाभली असून सदोदित येथे आध्यात्मिक कार्यक्रम सुरू असतात. त्यामुळे एखादा आध्यात्मिक पर्यटन प्रकल्प या तालुक्यात आणण्याचा सरकारचा प्रयत्न असल्यास त्याचे स्वागत असेल असे स्वामीजींनी स्पष्ट केले. त्यासाठी जी काय मदत हवी असेल, त्यासाठी अवश्य हाक द्या, असे त्यांनी पुढे सांगितले.