Canacona : काणकोणचे आमदार तथा सभापती रमेश तवडकर यांनी आज दिल्ली येथे केंद्रीय रस्ते वाहतूक आणि महामार्ग मंत्री नितीन गडकरी यांची भेट घेतली. यावेळी सभापती तवडकर व केंद्रीय मंत्री गडकरी यांच्यात विविध प्रकल्पाच्या विषयांवर चर्चा झाली.

यावेळी त्यांच्यासोबत काणकोणचे नगराध्यक्ष रमाकांत नाईक गावकर, शंभा नाईक देसाई हे उपस्थित होते. प्रकल्प मार्गी लावणार असल्याचे आश्वासन यावेळी गडकरींनी उपस्थितांना दिले.

सभापती रमेश तवडकर यांनी आज केंद्रीय मंत्री गडकरी यांची दिल्ली येथील शासकीय निवासस्थानी भेट घेतली. यावेळी शिष्टमंडळाने काणकोण-कारवार बायपास रोडवरील चार रस्ता येथील स्व. मनोहर पर्रीकर बगल मार्गाच्या चौकात छत्रपती शिवाजी महाराजांचा पुतळा बसविण्याचा प्रस्ताव सादर केला. यावेळी केंद्रीय मंत्र्यांनी पुतळा उभारण्यासंबंधी सहमती दर्शवली.

बेंदूर्डे ते काणकोण पर्यंत 14 किलोमीटर लांबीच्या एनएच 66च्या रस्त्याच्या कामाकरिता जमीन संपादन करण्याकरता 77 कोटी रुपये मंजूर करा अशी विनंती सभापती तवडकर यांनी केली. यावर केंद्रीय मंत्र्यांनी ही प्रक्रिया जलद गतीने करण्याच्या सूचना अधिकाऱ्यांना दिल्या आहेत असे सांगितले.