Goa Train: काणकोण रेल्वे स्थानकावर एकही एक्स्प्रेस रेल्वे गाडी थांबा घेत नसल्याने येथील लांब पल्ल्याच्या प्रवासासाठी मडगाव किंवा कारवार स्थानकावर जावे लागते. त्यासाठी एक्स्प्रेस रेल्वे गाड्या येथे थांबविण्याची मागणी प्रवाशांकडून करण्यात येत आहे. यापूर्वी नेत्रावती एक्स्प्रेस आणि मत्स्यगंधा एक्स्प्रेस रेल्वे गाड्या या रेल्वे स्थानकावर थांबा घेत होत्या.

त्याचप्रमाणे मंगला एक्स्प्रेस आणि मंगळुरू ते छत्रपती शिवाजी टर्मिनस एक्स्प्रेस या गाड्यांचा थांबा काणकोण रेल्वे स्थानकावर प्रवाशांच्या सोयीसाठी करणे गरजेचे आहे. यापूर्वी दिवंगत ज्येष्ठ स्वातंत्र्यसैनिक मुरलीधर राणे यांनी या एक्स्प्रेस गाड्यांना कणकोण रेल्वे स्थानकावर थांबा देण्यासाठी प्रयत्न केले होते.

त्यांच्या प्रयत्नांमुळे चार गाड्या येथे थांबा घेत होत्या. मात्र, कोविड महामारीदरम्यान या गाड्यांचा थांबा बंद करण्यात आला. तो पूर्ववत सुरू करावा, अशी मागणी करण्यात आली आहे. यासंदर्भात एक निवेदन सभापती रमेश तवडकर यांना देण्यात आले आहे.

वर्दळ वाढली

काणकाेण तालुक्यातून रेल्वेने प्रवास करणार्यांची संख्या बरीच वाढली आहे. या मार्गावरून लांब पल्ल्याच्या रेल्वे गाड्या जात असल्याने त्यांना काणकोण रेल्वे स्थानकावर थांबा देणे आवश्‍यक आहे. आता येथील प्रवाशांनी सभापती रमेश तवडकर यांना साकडे घातले आहे.