Calangute Road Issue सध्या गोव्यातील ग्रामीण भागातील रस्त्यांची दुर्दशा होत चालली असून काही दिवसांपूर्वी बागा येथील रस्ते दुरुस्तीचा प्रश्न उद्भवला होता. बागा नंतर आता कळंगुट येथील रस्त्यांची सुद्धा दुर्दशा झाली असून सार्वजनिक बांधकाम मंत्र्यांनी रस्त्यांच्या देखभालीकडे जाणीवपूर्वक दुर्लक्ष केल्याचा आरोप कळंगुट सरपंच जोसेफ सिक्वेरा यांनी केलाय.

शनिवारी झालेल्या पत्रकार परिषदेत बोलताना सिक्वेरा म्हणाले की, खराब रस्त्यांमुळे कळंगुटची प्रतिष्ठा खराब होत असून याचा फटका इथल्या पर्यटन व्यवसायावर होत आहे. खराब रस्त्यांमुळे पर्यटक पाठ फिरवत असून स्थानिक व्यापारावर देखील याचा विपरीत परिणाम होतोय.

मात्र कळंगुट शेजारच्या अर्पोरा-नागोवा-कॅंडोलिम सारख्या भागातील रस्त्यांची स्थिती चांगली असून सरकारचा कळंगुटबाबतीत असा दुजाभाव का? असा सवाल त्यांनी उपस्थित केले, मात्र सार्वजनिक बांधकाम मंत्र्यांनी कळंगुट ते बागा परिसरातील रस्त्यांची पीडब्ल्यूडी अधिकाऱ्यांकडून तातडीने पाहणी केल्यावर चक्क कळंगुट परिसरात खड्डे नसल्याचे सप्ष्टीकरण दिलेय.