Goa News: पर्यटनासाठी प्रसिद्ध असलेल्या कळंगुट गावात स्थानिकांच्या वस्तीबरोबरच पावलोपावली छोटे-मोठे गेस्ट हाऊस, रिसॉर्टस तसेच मोठमोठी पंचतारांकित हॉटेल्सही वाढत आहेत. त्यामुळे गावात वारंवार वीजपुरवठा खंडित होत असल्याच्या स्थानिकांच्या तक्रारी होत्या. हा प्रश्न कायमचा निकालात काढण्यासाठी सुमारे 25 कोटी रुपये खर्चून 14 नोव्हेंबरला उच्च क्षमतेचे वीज उपकेंद्र कार्यान्वित होणार असल्याची माहिती कळंगुटचे आमदार मायकल लोबो यांनी दिली.

पूर्णत्वास आलेल्या वीज उपकेंद्राच्या इमारतीची पाहणी केल्यानंतर लोबो प्रसार माध्यमांशी बोलत होते. यावेळी त्यांच्यासोबत कळंगुटच्या उपसरपंच गीता परब तसेच वीज खात्याचे अधिकारी उपस्थित होते. ऑगस्ट 2021 मध्ये सुरू केलेले या वीज उपकेंद्राचे बांधकाम एका वर्षात पूर्ण केल्याचे लोबो यांनी यावेळी सांगितले.

बार्देश तालुक्याला अखंडित वीजपुरवठा करण्यासाठी साळगाव येथील वीज उपकेंद्राची क्षमता वाढवणे गरजेचे आहे. यासंदर्भात मुख्यमंत्री डॉ. प्रमोद सावंत यांच्याशी बोलणी केल्याचे लोबो यांनी सांगितले.