कळंगुट: गोव्यातील प्रसिद्ध कळंगुट समुद्रकिनाऱ्यावर सोमवारी सकाळी सव्वासहा वाजण्याच्या सुमारास मणिपूरमधील टी. सपुलू (वय १९) या युवकाचा बुडून मृत्यू झाल्याची दुर्दैवी घटना घडली.

कळंगुट पोलिसांनी दिलेल्या माहितीनुसार, चार मित्रांचा गट कळंगुट समुद्रकिनाऱ्यावर फिरण्यासाठी गेला होता. सपुलूने एकट्याने समुद्रात पोहण्यासाठी उतरण्याचा हट्ट धरला. मित्रांनी त्याला समुद्रात जाण्यापासून रोखण्याचा प्रयत्न केला, मात्र तो ऐकला नाही. पोहत असतानाच अचानक मोठी लाट आली आणि त्याला समुद्राच्या खोल भागात ओढून नेले.

सुमारे अर्ध्या तासानंतर सपुलूचा मृतदेह पाण्यात तरंगताना आढळून आला. कळंगुट पोलिसांनी घटनास्थळी पंचनामा करून मृतदेह उत्तरीय तपासणीसाठी गोमेकॉ (गोवा वैद्यकीय महाविद्यालय) रुग्णालयात पाठवला.

दरम्यान, सपुलू हा आपल्या इतर तीन मित्रांसह कांदोळी परिसरातील एका हॉटेलमध्ये कामाला होता, अशी माहिती समोर आली आहे. या दुर्घटनेमुळे पर्यटकांमध्ये भीतीचे वातावरण निर्माण झाले आहे. पोलिसांनी पर्यटकांना समुद्रातील सुरक्षिततेचे नियम पाळण्याचे आवाहन केले आहे.