Tragic Death: चिमुकलीने गिळला जिवंत मासा, बस्तोड्यातील दुर्दैवी घटना; 6 वर्षाच्या बाळाचा मृत्यू

म्हापसा: बस्तोडा येथे रविवारी रात्री एक हृदयद्रावक घटना घडली. घरात खेळत असताना एका सहा महिन्याच्या चिमुकलीने पाण्याच्या टबमधून जिवंत मासा उचलून तोंडात टाकल्याने तिचा गुदमरून मृत्यू झाला.

पोलिसांनी दिलेल्या माहितीनुसार, चिमुरडी काही इतर लहान मुलांबरोबर घरात खेळत होती. खेळता खेळता तिने टबमधील जिवंत मासा उचलून तोंडात टाकला. त्यामुळे तिचा श्वास कोंडू लागला.

तिला तातडीने म्हापसा येथील खाजगी रुग्णालयात नेण्यात आले; मात्र डॉक्टरांनी तिचा मृत्यू झाल्याचे घोषित केले. या प्रकरणाची चौकशी करताना पोलिसांना मुलीच्या वडिलांनी सांगितले की घरातील एका टबमध्ये मासे ठेवलेले होते.

सदर दुर्घटना घडली त्या वेळेस मुलगी एकटीच होती, त्यामुळे तिने मासा तोंडात घातल्याची शक्यता आहे. म्हापसा पोलिसांनी या घटनेची नोंद अनैसर्गिक मृत्यू म्हणून केली असून, पुढील तपास पोलीस उपनिरीक्षक दत्तप्रसाद पंडित करीत आहेत.