Kerala Serial Blast Case केरळ एर्नाकुलम येथील एका कन्व्हेन्शन सेंटरमध्ये रविवारी सकाळी भीषण स्फोट झाल्याचे वृत्त प्रसारित झाल्यावर गोव्यातील सुरक्षा यंत्रणा सतर्क झाल्या आहेत. विशेष म्हणजे काणकोण येथील ज्यू नागरिकांच्या प्रार्थना स्थळावरची सुरक्षा व्यवस्था वाढवण्यात आलीय.

या प्रार्थना स्थळाबाहेर पोलीस फौजफाटा तैनात करण्यात आलाय. शिवाय अन्य सुरक्षा यंत्रणेत वाढ करण्यात आली आहे का या संबंधी माहिती उपलब्ध होऊ शकली नाही.

दरम्यान केरळ एर्नाकुलम येथील एका कन्व्हेन्शन सेंटरमध्ये रविवारी सकाळी भीषण स्फोट झाला असून या घटनेत एकाचा मृत्यू झाल्याची माहिती मिळाली. या स्फोटात अनेक जण जखमी झाल्याचेही वृत्त समजतेय.

मिळालेल्या माहितीनुसार, कन्व्हेन्शन सेंटरमध्ये प्रार्थना सभेसाठी अनेक लोक जमले असताना हा स्फोट झाला. पोलिसांनी दिलेल्या माहितीनुसार, पहिला स्फोट सकाळी नऊच्या सुमारास झाला.

पुढच्या काही मिनिटांत एकामागून एक स्फोट झाले. या घटनेच्या तपासासाठी एनआयए आणि एनएसजीची टीम केरळला रवाना झाल्याचं सांगण्यात येत आहे.