Goa Politics: सभापतींनी विरोधी पक्षनेते म्हणून मान्यता दिलेले युरी आलेमाव यांना आतापर्यंत सुरक्षा पुरविण्‍यात आलेली नाही. उलट माजी विरोधी पक्षनेते मायकल लोबो यांना दिलेले सुरक्षारक्षक आजही त्यांच्या सेवेत असल्याचे समजते.

पक्षांतर करणाऱ्या फुटिरांना सुरक्षेची जास्त गरज असावी असे मुख्यमंत्र्यांना वाटत असावे, असा टोला काँग्रेसचे प्रदेशाध्यक्ष अमित पाटकर यांनी केला. पाटकर यांनी दिलेल्या प्रसिद्धीपत्रकात म्हटले आहे, आलेमाव यांना विरोधी पक्षनेते म्हणून मान्यता दिल्यानंतर जवळपास 22 दिवस उलटून गेले आहेत.

तरीही त्यांना सुरक्षा का दिली गेली नाही, हे पोलिस महासंचालकांनी स्पष्ट करावे. विरोधी पक्षनेते या पदाचा हा विशेषाधिकार आहे. पोलिस खात्याने सरकारच्या दबावाखाली काम करू नये, असा सल्लाही पाटकर यांनी दिला आहे.

माजी आमदार बाबू कवळेकर यांनी घटनात्मक स्थान नसलेले उपमुख्यमंत्रिपद भूषविले होते. त्यांना अजूनही सुरक्षा आहे. भाजप सरकारकडून सत्तेचा गैरवापर होत असल्‍याचे हे एक उदाहरण आहे, असेही पाटकर यांनी नमूद केले आहे.