Goa BITS Pilani: बिट्‍स पिलानी संस्थेच्या के. के. बिर्ला गोवा कॅम्पसच्या एका विद्यार्थ्याला प्लेसमेंटमधून वार्षिक 60 लाख 80 हजार रुपये पगार देऊ करण्यात आला आहे.

हे पॅकेज गेल्या वर्षी देशांतर्गत देऊ केलेल्या सर्वोच्च पगारापेक्षा 35 टक्क्यांहून जास्त आहे, असे संस्थेच्या अधिकाऱ्यांनी सांगितले.

ऋतुराज गोडसे असे या विद्यार्थ्याचे नाव असून तो कॉम्प्युटर सायन्स इंजिनिअरिंगचा विद्यार्थी आहे. त्याला डी. ई. शॉ या बहुराष्ट्रीय गुंतवणूक व्यवस्थापन फर्मने हे पॅकेज देऊ केले आहे.

वर्षाला 40 लाख रुपये पगार घेणाऱ्या विद्यार्थ्यांची संख्या गतवर्षीच्या तुलनेत दुप्पट झाली आहे. बिट्‍स पिलानी गोवा कॅम्पसमध्ये सुमारे 280 कंपन्या आल्या होत्या. त्यात गुगल, मायक्रोसॉफ्ट, उबेर, डीई शॉ, टेक्सास इन्स्ट्रूमेंटस्, एक्सॉन मोबाईल आदी कंपन्यांचा समावेश होता.

79 विद्यार्थ्यांना 40 लाखांच्या नोकऱ्या

बिट्‍स पिलानीच्या के. के. बिर्ला गोवा कॅम्पसमध्ये 926 पेक्षा जास्त विद्यार्थ्यांनी प्लेसमेंटसाठी नोंदणी केली होती.

संस्थेतील भारत आणि दुबईसाठीचे मुख्य प्लेसमेंट अधिकारी जी. बालसुब्रमण्यम यांनी ही माहिती दिली.

बालसुब्रमण्यम यांच्या माहितीनुसार, नोंदणी केलेल्या विद्यार्थ्यांपैकी 79 हून अधिक विद्यार्थ्यांना वर्षाला ४० लाख रुपयांपेक्षा जास्त पगार मिळाला आहे.

संस्थेच्या कॅम्पस प्लेसमेंटमध्ये ही आत्तापर्यंतची सर्वोच्च विद्यार्थी संख्या आहे.

नोकरीची संधी मिळालेले विद्यार्थी

या प्लेसमेंटमध्ये जगातील दिग्गज कंपन्यांकडून मोठ्या संख्येने ऑफर आल्या. ॲमेझॉनने - 32 विद्यार्थ्यांना, उबेरने 16, मायक्रोसॉफ्टने17, नुटानिक्सला 13 आणि गुगलने 7 विद्यार्थ्यांना नोकऱ्या दिल्या.